Siemens Azərbaycanda bir sıra enerji layihələrini reallaşdırmaq niyyətindədir. Siemens-in Azərbaycandakı nümayəndəliyinin baş direktoru Samir Axundovun Trend ə verdiyi məlumata görə, hazırda Siemens Xaçmazda 330/110 kV-luq yarımstansiyanın tikinti layihəsinin reallaşdırılmasında maraqlıdır. Azərenerji Səhmdar Cəmiyyəti 2006-cı ildən Xaçmazda 330/110 kV-luq yarımstansiyanın tikintisinə başlamaq niyyətindədir. Bu layihənin maliyyələşdirilməsi İslam İnkişaf Bankının (İİB) vəsaiti hesabına həyata keçirilməlidir. Sentyabrın 1-də Azərbaycan prezidenti İlham Əliyev İİB-nın Xaçmazda yarımstansiyanın tikintisi ilə bağlı kredit ayırması barədə razılaşmanı imzalayıb. Laiyhənin reallaşdırılması 500 min əhalinin yaşadığı respublikanın şimal rayonlarının enerji təchizatını yaxşılaşdırmağa imkan verir. İİB-nın 13,508 milyon dollar həcmində kredit vəsaiti 6%-lik illik dərəcə üzrə 12 illiyə ayrılıb.
Şirkətin reallaşdırmağa maraqlı olduğu digər layihə Mingəçevirdəki Su Elektrik Stansiyasıdır. "Hazırda ölkə hökuməti, Azərenerji və Avropa Yenidənqurma və İnkişaf Bankı (AYİB) bu layihə üçün maliyyə vəsaitinin ayrılması üçün danışıqlar aparır ", - deyə S.Axundov qeyd edib. Bu layihənin təsdiqlənməsinə dair müzakirələrin noyabrın 1-də müzakirə olunması planlaşdırılır. AYİB ümumi məbləği 135 milyon dollar olan bu layihə üçün 100 milyon dollar ayırmaq niyyətindədir.
Şirkət həmçinin, Dünya Bankının maliyyələşdirdiyi SCADA sisteminin tətbiqi üzrə layihənin ikinci mərhələsilə bağlı tenderdə də iştirak etmək niyyətindədir. 2005-ci il mayın 17-də DB-nın Direktorlar Şurası Enerji Ötürücüləri layihəsinə (Power Transmission Project) kreditin ayrılmasını təsdiqləyib. Layihənin peallaşdırılması üçün ayrılan kredit 48 milyon dollar olub 20 il msüddətinə verilir. Layihə enerjitəminatı sistemlərinin yaxşılaşdırılmasına və onların idarə olunmasına yönəlib. Bu kredit DB-nın Azərbaycanda Beynəlxalq Yenidənqurma və İnkişaf bankının vəsaiti hesabına maliyyələşdirdiyi ilk kreditdir.