Sədr Əhməd Erentokun rəhbərliyi ilə Azərbaycan-Türkiyə iş adamları birliyi (ATIB) nümayəndə heyətinin Türkiyəyə səfəri çərçivəsində Türkiyənin ən böyük ictimai qurumlarındani biri olan TUSIAD-ın sədri Ömər Sabancı ilə görüş keçirilib. Trend bildirir ki, bu barədə ATIB-in yaydığı məlumatda deyilir.
Nümayəndə heyəti TUSIAD rəhbərliyinə Avrasiya iş adamları Birliyinin yaradılması istiqamətində görülən işlər barədə məlumat verib və Ö. Sabancı bildirib ki, onlar bu təşkilatın yaradılmasında yardım etməyə hazırdır.
ATIB-in nümayəndə heyəti həmçinin TUSIAD International nümayəndələri ilə görüş keçirib və onları Azərbaycandakı iqtisadi vəziyyət və inkişaf, eləcə də perspektivlər barədə məlumatlandırıb. Azərbaycana investisiya qoyulması ilə bağlı fikir mübadiləsi aparılıb.TUSIAD International nümayəndələri ölkə iqtisadiyyatı ilə tanış olmaq üçün Azərbaycana dəvət olunub. Yaxın vaxtlarda nümayəndə heyətinin Bakıya səfəri gözlənilir. Həmçinin nümayəndə heyəti Mərmərə sosial və strateji Araşdırmaları Vakfı və Türkiyənin xarici ticarət əlaqələri Komitəsinin Türk-Avrasiya Biznes Şurasının sədrləri ilə də görüşlər keçirib.
