Ağdamın kənd yerlərinin inkişafının yeni layihələrinin reallaşdırılması üzrə donor təşkilatlarla danışıqlar aparılır. Kənd Təsərrüfatı Nazirliyindən Trend ə verilən məlumata görə, Nazirliyin BMT-nin Ərzaq və Kənd Təsərrüfatı təşkilatının (FAO- Food and Agriculture Organization of the United Nations) mütəxəssisləri ilə birgə hazırladıqları layihə FAO-nun texniki əməkdaşlıq proqramı layihəsi çərçivəsində həyata keçiriləcək.
Dövlət strukturundan bildirilib ki, 2 layihə üzrə ( "Ağdamda qaçqınlar və məcburi köçkünlər üçün yeni salınan qəsəbələrində kənd ərazilərinin inkişafı üçün şəraitin yaradılması" və "Ağdamda yeni salınan qəsəbələrdə zəruri məhsulların istehsalı və satışının başlanması") artıq Azərbaycan hökumətinin mövqeyi müəyyən edilib.
Artıq Yaponiya və Norveç səfirlikləri ilə bu ölkələrin layihələri maliyyələşdirən donorlar kimi cəlb edilməsi üçün danışıqlar aparılır. Hər iki tərəf layihələrin reallaşdırılmasında maraqlı olduqlarını ifadə ediblər.
Ümumi dəyəri $400 min və $1 mln. 200 min olan layihələrdən 15% -i Azərbaycanın, qalan hissəsi isə FAO və İsveçrə Beynəlxalq İnkişaf və Əməkdaşlıq Agentliyinin payına düşür və tərəflər arasında artıq ilkin razılıq əldə olunub.
