Asiya İnkişaf bankının yol sektoru üzrə iqtisadçısı Honq Vanqın rəhbərlik etdiyi missiya Ələt-Astara avtomobil magistralının yenidən qurulması layihəsinin hazırlanması üçün Bakıdadır. Hökumətdən Trend ə verilən məlumata görə, AİB Şorsulu-Astara avtomobil magistralının bir hissəsinin yenidən qurulmasına $100 mln ayırmağı planlaşdırır.
Bank layihənin Direktorlar Şurasında təsdiqlənməsini 2006-cı ilə planlaşdırır. Missiya işini fevralın 16-dək başa vuracaq.
Yolun Ələtdən Astarayadək olan hissəsinin maliyyələşdirilməsini üzərinə götürən Dünya bankı 2006-cı il yanvarın 17-də qərar qəbul edib. Bank iki hissədən (Ələt-Şorsulu və Bakı-Şamaxı-Muğan) ibarət olan layihənin maliyyələşdirilməsi üçün $200 mln ayıracaq. Bu, ikinci avtomobil yolu üçün ilk tranş olacaq. Yerdə qalan vəsait isə artıq ikinci kredit çərçivəsində ayrıla bilər.
Ələt-Masallı yolunun maliyyələşdirilməsi üçün bank təxminən $230-240 mln, Bakı-Şamaxı -Muğanlı yolu üçün isə - $100 mln ayırmağı planlaşdırır.
Bank tərəfindən kreditlər BYİB-nin şərtləri əsasında - 0,5%-lə və 4 il güzəşt dövrü ilə 20 il müddətinə ayrılır.
Bu layihədə, həmçinin, $40 mln ayırmağı planlaşdıran İran bankının da iştirakı gözlənilir.