Asiya İnkişaf Bankı Ələt-Astara avtomobil magistralının yenidən qurulması layihəsinin hazırlanması üçün $400 min qrant ayırıb. Bankın Bakı nümayəndəliyinin rəhbəri Metyü Vestfolun Trend ə verdiyi məlumata görə, hazırda texniki yardım sənədinə Azərbaycan hökuməti tərəfindən baxılır. Bu sənəd AİB missiyası tərəfindən işlənib-hazırlanmaq üçün imzalanmalıdır.
AİB Şorsulu-Astara avtomobil magistralının bir hissəsinin yenidən qurulması üçün $100 mln ayırmağı planlaşdırır.
Layihənin 2006-cı ildə Direktorlar Şurasında təsdiqlənməsi nəzərdə tutulur.
Yolun Ələtdən Şorsuluyadək olan hissəsini maliyyələşdirməyi öz üzərinə götürmüş Dünya bankı 17 yanvar 2006-cı il tarixində qərar qəbul edib. Bank iki hissədən (Ələt-Şorsulu və Bakı-Şamaxı-Muğan) ibarət olan layihənin maliyyələşdirilməsi üçün $200 mln ayıracaq. Bu, 2-ci avtomobil magistralı üçün 1-ci tranş olacaq. Çatışmayan vəsaitlər isə artıq 2-ci kredit çərçivəsində ayrıla bilər.
Bank Ələt-Masallı yolunun maliyyələşdirilməsi üçün təxminən $230-240 mln, Bakı-Şamaxı-Muğan üçün isə $100 mln ayırmağı planlaşdırır.
Kreditin Beynəlxalq Yenidənqurma və İnkişaf Bankının şərtləri ilə 20 il güzəşt dövrü və libor+0,5%-lə 4 il müddətinə ayrılması nəzərdə tutulur.
Layihədə, həmçinin, $40 mln ayırmaq niyyətində olan İran bankının da iştirakı planlaşdırılır.
