...

İl ərzində bankların məcmu kapitalı 26,9% artıb

Biznes və iqtisadiyyat xəbərləri Materials 28 Aprel 2006 13:46 (UTC +04:00)

Azərbaycan Milli Bankının məlumatına görə, 2006-cı il aprelin 1-i üçün Azərbaycanda fəaliyyət göstərən bankların məcmu kapitalı 26,9% artaraq 276,4 mln.AZN təşkil edib. Bu barədə Trend ə AMB-dən məlumat verilib. Belə artım təkcə özəl bankların deyil, həm də dövlət banklarının nizamnamə fondlarının artması ilə şərtlənib. Bu proses 2005-ci ilin dekabrından başlayıb. İl ərzində dövlət banklarının nizamnamə kapitalları 42% artaraq 42 mln AZN təşkil edib. Ancaq özəl bankların nizamnamə kapitalının artım göstəricisi 10,4% həddində olub və aprelin 1-i üçün 234,3 mln. AZN təşkil edib. Nizamnamə kapitallarının belə artım dinamikası AMB-nin 1 iyul 2006-cı il üçün müəyyən etdiyi 6,4 mln AZN həcmində yeni normativ tələbin yerinə yetirilməsi ilə şərtlənib. Bu gün bir bankın payına düşən nizamnamə kapitalının həcmi 6,3 mln. AZN təşkil edir.

100% nizamnamə kapitalına malik bankların payına 23,2 mln. AZN düşür. İl ərzində artım 0,9% təşkil edib. 1 aprel 2005-ci ilə olan vəziyyət üzrə bütün bankların məcmu həcmində bankların NK-nın xarici kapitalla birgə xüsusi çəkisi 34,8%-dən 35,7%-dək artıb. Ancaq il ərzində 100% xarici kapitala malik bankların kapitallarının xüsusi çəkisi 2,2% azalıb. Bankların kapitalında xarici sərmayələrin payı 49,3 mln.AZN təşkil edir. Nizamnamə kapitallarının ümumi həcmində bu kapitalların xüsusi çəkisi 17,8%-dir.

1 aprel 2006-cı ilə olan vəziyyət üzrə, bank fəaliyyətini həyata keçirmək üçün 129 kredit təşkilatına lisenziya verilib. Bunun 85-i qeyri-bank kredit təşkilatıdır. Ölkədə fəaliyyət göstərən 44 bankdan 41-i əmanət cəlb edə, 43-ü xarici valyuta, 3-ü qiymətli materiallar, 34-ü plastik kartlarla əməliyyatlar apara, 41-i zəmanət verə bilər. İl ərzində mövcud filiallara daha 25-i əlavə olunub və filialların sayı 378-ə çatıb.

Azərbaycanda xarici kapitala malik 18 bank fəaliyyət göstərir. 7 bankda xarici kapital 50%-dən 100%-dək, 11-də isə 50%-dək iştirak payına malikdir. Bundan başqa, qeyri-rezident bankların 2 filialı da fəaliyyət göstərir.

Xəbər lenti

Xəbər lenti