POS-terminalların ölkənin ticarət obyektlərində tətbiqi prosesi fəallaşdırılıb və bu gün onların sayı 2 mini keçib. Bu barədə Trend ə "Azərikard" prosessinq mərkəzindən bildiriblər. İlin sonuna qədər respublika üzrə 5 minə qədər terminalın quraşdırılacağı gözlənilir.
Mərkəzdə belə canlanma onunla izah olunur ki, bank əməkdaşlarından başqa bu prosesə vergi müfəttişliyi də qoşulub. Yarım ildən sonra qoşulma prosesi tezləşəcək, belə ki, hazırda ticarət obyektləri və digər xidmət sahələri obyektlərdəki uzaq nöqtələrdən kassaya telefon xəttinin çəkilişi kimi bəzi problemləri həll etməli olurlar. Terminallar telefon xəttinə qoşulduğundan paytaxtdan kənarda problemlər yaranır. Sahibkarların büdcəsinə ziyan verəcək əlavə maliyyə vəsaitlərindən istifadə etməmək üçün Rabitə və İnformasiya Texnologiyaları Nazirliyinin müəssisəsi ilə terminallar üçün xüsusi kanalın quraşdırılması haqqında danışıqlara başlamağı planlaşdırırlar. Bu, paytaxtdan kənarda terminalların quraşdırıldığı obyektlərdə əlaqə yaratmağa imkan verəcək.
Hazırda POS-terminalların tətbiqi üzrə lider Azərbaycan Beynəlxalq Bankıdır. Quraşdırılmış aparatlardan 1,5 mini ona məxsusdur. Onun ardınca Kapitalbank (300 terminal) gəlir, qalan hissəni Azəriqazbank, Bank Standart və digər banklar bölüşdürürlər.
POS-terminallar mehmanxanalarda, beynəlxalq və şəhərdaxili sərnişin daşımaları üçün bilet satışı üzrə müəssisələrdə, avtovağzallarda, əyləncə obyektlərində tətbiq ediləcək. Təbii ki, obyektlər Nazirlər Kabinetinin təsdiq etdiyi meyarlara cavab verməlidir. Əsas meyar ayda minimal həcmi 5 mln. manatdan az olmayan dövriyyədir.