Ticari-İqtisadi, Elmi-Texniki və Mədəni Əməkdaşlıq üzrə Azərbaycan-Tatarıstan Hökumətlərarası Komissiyasının birinci iclasının nəticələrinə əsasən protokol imzalanıb. Sənədə komissiyanın sədrləri, Azərbaycan və Tatarıstan baş nazirləri Artur Rəsizadə və Rustam Minnixanov imza atıb.
Komissiyada tərəflər təsərrüfat subyektləri arasında birbaşa əlaqələrin inkişafına, birgə müəssisə, nümayəndəlik və filialların açılmasına, investisiya layihələri ilə bağlı fikir mübadiləsi aparmağa, eləcə də Tatarıstanın maşınqayırma zavodlarının Azərbaycan ərazisində fəallaşdırılmasına köməklik göstərmək haqqında razılığa gəlib.
ARDNŞ və "Zelenodolski" zavodu A45 layihəsi əsasında hazırlanmış sərnişin sürət gəmilərinin alınması imkanlarını nəzərdən keçirəcək.
Tərəflər sənaye müəssisələri arasında əməkdaşlıq əlaqələrinin qurulması və birgə müəssisələrin yaradılması haqqında konkret təkliflərin mübadiləsi ilə bağlı razılığa gəlib. Azərbaycan və Tatarıstan ərazisində istehsal olunan neft-mədən avadanlığı və ehtiyat hissələrinin qarşılıqlı çatdırılması məsələsinin həlli təklif olunub.
İT texnologiyaları sahəsində birgə layihələrin gerçəkləşdirilməsi məsələləri nəzərdən keçirilib, İT sahəsində əldə olunmuş təcrübə öyrənilib. Bundan əlavə, "elektron hökumət"in tədbiqilə bağlı seminar, konfrans, forum və sərgilərin keçirilməsi planlaşdırılır. İclasda elmi-texniki, mədəni və humanitar sahələrdə əməkdaşlığın inkişafı istiqamətində razılıq əldə olunub və bununla əlaqədar tədbirlər müəyyənləşdirilib.
İclas zamanı hökumətlərarasın komissiyanın əsasnaməsi təsdiqlənib.
Növbəti ikinci iclası 2007-ci ildə Kazanda keçirmək planlaşdırılır.
