1 oktyabr 2006-cı ildən etibarən "Millikart" kart ödəmələri prosessinq mərkəzi müstəqil qurum - "Millikart" məhdud məsuliyyətli cəmiyyət kimi fəaliyyətə başlayır. Mərkəzdən Trend ə verilən xəbərə görə, bu qərar MMC -nin Direktorlar şurasının sentyabrın 26-da keçirilmiş ilk toplantısında qəbul olunub.
Bununla əlaqədar bu həftənin sonunadək təhvil-təslim proseduru başa çatacaq və AMB və MMC-nin 18 təsisçi - bankları arasında kart ödəmələri prosessinq mərkəzinin əmlakının və qeyri-maddi aktivlərinin alqı-satqısı haqqında müqavilə imzalanacaq. "Millikart" MMC-nin fəaliyyətə başladığı gündən - oktyabrın 1-dən etibarən Milli Bankın mərkəzdə çalışan bütün əməkdaşları "Millikart"a keçəcəklər.
Toplantıda mərkəzin 34 nəfərdən ibarət ştatı təsdiq olunub. MMC Direktorlar şurasının iclasının müzakirə mövzusu həmçinin MMC -nin strukturu, tariflər, mərkəzin inkişaf planı olub. Bu məsələlər təsdiq olunub, həmçinin digər əsas məsələlər də müzakirə edilib.
Milli bank mərkəzin 18 bankın idarəsinə verilməsi haqqında təsis müqaviləsi imzalayıb. MMC 14 iyul 2006-cı ildə təsis edilib. Mərkəzin təsisçiləri Atabank, Azərdəmiryolbank, Azərtürkbank, Bank of Baku, CIBank Debutbank, Əmrahbank, Xalqbank, Kredobank, Azərbaycan mikromaliyyələşdirmə bankı, Parabank, Rabitəbank, Respublikabank, Bank Standard, Texnikabank, Turanbank, UniBank və Zaminbankdır.