"Təhsil haqqında" qanunun müzakirəsi ilə bağlı bir qrup millət vəkilinin Naxçıvan Muxtar Respublikasına (NMR) səfəri planlaşdırıb. Bu barədə Trend ə Milli Məclisin elm və təhsil məsələləri daimi komissiyasından bildiriblər.
Səfər oktyabrın sonlarında nəzərdə tutulub. O da qeyd olunub ki, adıçəkilən sənədi oktyabrda ilk oxunuş üçün müzakirəyə çıxarmaq planlaşdırılıb. Paralel olaraq sənədin geniş ictimai müzakirəsi də nəzərdə tutulub. Layihə mətbuat orqanlarında çap ediləcək. Ayrı-ayrı televiziya kanallarında diskussiyalar təşkil olunacaq. NMR-də layihənin geniş müzakirəsi təşkil ediləcək.
Onu da bildirək ki, Azərbaycan "Boloniya prosesi"nə qoşularaq təhsil islahatları ilə bağlı böyük öhdəliklər götürüb. 2009-cu ilə qədər bu proses tam başa çatmalıdır. "Boloniya prosesi" qarşıya ciddi tələblər qoyur. Burada təhsilin əsas subyekti təhsil alandır. Bu məsələlər də layihədə öz əksini tapacaq.
