Gələn həftə "MAZ" Minsk avtomobil zavodunun və Minsk traktor zavodunun mütəxəssisləri yük maşınları və traktor quraşdırılması üzrə Gəncə avtomobil zavodunda bu müəssisələrin istehsalat xəttini qaydaya salmaq üçün Azərbaycana gələcəklər. Bu barədə Trend ə cümə axşamı Gəncə zavodunun başçısı Xanlar Fətiyev məlumat verib.
Avtomobil zavodu bu il yanvar ayının üçüncü dekadasında "MAZ" Minsk avtomobil zavodu və Minsk traktor zavodunun istehsalı olan yük maşınları və traktorlarının quraşdırılmasına başlayacaq.
Azərbaycanda bu müəssisələrin istehsalı olan yük maşınları və traktorların bütün qammasının quraşdırılması və satışı üçün müqavilə noyabr ayının sonunda Minskdə (Belarus) imzalanıb.
Quraşdırılmaının 15 min kvadrat metr sahəli ərazidə başlanması nəzərdə tutulub. Traktor zavodu 500-ə qədər, avtomobil zavodu isə 400-ə qədər məhsul modifikasiyası buraxır. Gəncə zavodu Azərbaycanda ildə 1000-ə qədər yük maşını və 1000-ə qədər traktor quraşdıra bilər. X.Fətiyevin qeyd etdiyi kimi, birinci mərhələdə müəssisədə Belarus zavodlarından hər birinin istehsalı olan üç modifikasiya quraşdırılacaq. Hazır məhsulun satışı zavodun dilerləri vasitəsilə həyata keçiriləcək.
Müəssisədə artıq Çinin Cangan şirkətinin avtomobilləri yığılır.
