Bu gün layihə qrupunun rəhbəri və nəqliyyat üzrə baş mütəxəssis Cerald Olivyenin başçılığı ilə Dünya bankının missiyası Azərbaycanın dəmir yolu və ticarət üçün tranzitə yardım layihəsi üzrə danışıqlara başlayıb.
DB-nin Bakı nümayəndəliyindən Trend ə verilən məlumata görə, layihənin texniki aspektlərinin müzakirəsi üçün Nəqliyyat Nazirliyi və ADDY-də görüşlər nəzərdə tutulub, Dəmir yolu idarəsinin strukturunun dəyişdirilməsi məsələləri isə Nazirlər Kabineti, Maliyyə və İqtisadi İnkişaf Nazirliklərində keçiriləcək görüşlərdə nəzərdən keçiriləcək. Layihənin hazırlanması prosesinə həmçinin DB-də Cənubi Qafqaz üzrə aparıcı iqtisadçı Kristian Pitersen də qoşulacaq. Onun Bakıya səfəri fevralın 30-da başlayacaq.
Layihədə dəmir yolu ilə sərnişin və yük daşınmasının restrukturlaşdırılması və ADDY-nin maliyyə menecmentinin beynəlxalq standartlara uyğunlaşdırılması nəzərdə tutulub. həmçinin ADDY-nin rəqabət qabiliyyətinin yüksəldilməsi, səmərəliliyin və kommersiya istiqamətinin yaxşılaşdırılması nəzərdə tutulub.
Səfər fevralın 8-dək davam edəcək. Layihə 2006-cı ilin əvvəlindən hazırlanır. Və Yaponiya hökumətinin PHDR fondundan 900 min ABŞ dollarından çox həcmdə qrant vəsaitləri üçün məsləhətçilər cəlb olunub və onlar texniki-iqtisadi əsaslandırmanı hazırlayırlar.
DB-nin Azərbaycan hökuməti ilə tərəfdaşlıq strategiyasına əsasən (2007-10-cu illər) dəmir yolu və ticarət üzrə tranzitə yardım layihəsinə 80 mln. ABŞ dolların ayrılması planlaşdırılır. Onun DB-nin 2007-ci maliyyə ilinin sonuna, iyunun sonunadək bankın Direktorlar şurasında təsdiq olunacağı gözlənilir. Kredit Beynəlxalq Yenidənqurma və İnkişaf Bankının şərtləri ilə veriləcək.