Azərbaycan, Bakı /müx . Trend İ.Xəlilova / Bu gün ABŞ-ın beynəlxalq inkişaf üzrə agentliyi (USAID) Azərbaycan hökumətinə Ümumdünya Ticarət Təşkilatına (ÜTT) qəbulla bağlı danışıqlar prosesində texniki yardım göstərilməsinin başlanması ilə bağlı təqdimat mərasimi həyata keçirəcək. Bu barədə Xarici İşlər Nazirliyindən verilən məlumatda bildirilir.
Ölkə hökuməti qanunvericiliyin ÜTT tələblərinə uyğun təkmilləşdirilməsi üçün ABŞ-a müraciət etmişdir. Yardımın konkret istiqamətləri təqdimat mərasimində açıqlanacaq. USAİD-in yardımının ümumi həcmi təxminən 3 mln. dollar təşkil edəcək.
Üç il ərzində sənədlərin hazırlığı ilə bağlı texniki yardım və ümumiyyətlə məsləhət xidmətlərinin göstərilməsi ABŞ-ın ticarət və inkişaf agentliyi tərəfindən həyata keçirilib. Lakin 2006-ci ilin sentyabrında agentlik bu vəzifədən imtina edib.
Axırıncı məsləhətləşmələr 2005-ci ildə 981 min dollarlıq qrant sazişi çərçivəsində olub. ABŞ-a məxsus "Boos-Alen-Hamelton"un yerdəki nümayəndəsi qismində yerli "Omni" hüquq şirkəti çıxış edib. Bu ABŞ hökumətinin Azərbaycan hökumətinə göstərdiyi ilk yardım deyil. İlk müvafiq razılaşma üç il əvvəl imzalanıb. Həmin razılaşmanın dəyəri 1,943 mln. dollar olub.
