Azərbaycan, Bakı/ Trend müxbir İ.Xəlilova/ Azərbaycan Milli Bankına yeni bankın -Pasa Bankın açılmasına lisenziya alınması üçün ilkin müraciət daxil olub. Bu barədə çərşənbə günü AMB idarə heyətinin sədr müavini Rüfət Aslanlı məlumat verib.
"Biz sənədlərin araşdırılmasına başlamışıq, ona görə səhmdarların tərkibi haqqında heç nə deyə bilmərəm",-deyə Aslanlı söyləyib.
Məlumdur ki, Pasa Bank 2007-ci ildə yaradılmış Pasa Holding-in daha bir bölmə strukturu olacaq. Holding-in tərkibində artıq Pasa Sigorta, Pasa Insaat və Pasa Travel təmsil olunur. Sığorta şirkəti 2006-cı ildə, turizm və tikinti şirkətləri isə 2007-ci ildə yaradılıb.
Azərbaycanda cəmisi 44 bank fəaliyyət göstərir. Öz fəaliyyəti barədə məlumat təqdim etmədiyinə görə, yalnız Poct Bank-ın məlumatları Milli Bankın hesabatında yer almır.
