Azərbaycan, Bakı/ Trend müxbir İ.Xəlilova/ Azərbaycan kənd təsərrüfatı nazirliyi yanında kənd təsərrüfatı üçün kreditlər üzrə Dövlət agentliyi Kənd Təsərrüfatının İnkişafı Beynəlxalq Fondunun (IFAD) "Azərbaycanın şimal-şərq regionunun inkişafı" (North Development Project) layihəsi çərçivəsində müvəkkil bank qismində seçilmiş üç bankla müqavilə bağlayıb. Bu barədə banklardan birindən məlumat verilib. Layihəyə Muğanbank, Texnikabank və Turanbank cəlb olunub.
IFAD-ın birinci layihəsində müvəkkil bank vəzifəsini bir bank - Turanbank yerinə yetirib.
27 iyul 2007-ci il Bakıda imzalanmış müqavilə üzrə layihə ölkənin 4 şimal-şərq rayonunu - Xızı, Siyəzən, Dəvəçi və Abşeronu əhatə edir.
Bu layihədə kredit kompanenti 4,8 mln. dollar təşkil edir. Müvəkkil banklar tərəfindən təsərrüfatdaxili meliorasiya tədbirlərinin həyata keçirilməsi üçün verilə bilən kreditlərin maksimum məbləği 25 min dollar, minimum məbləği isə min dollar həddində müəyyən olunub.
Layihənin ümumi məbləği $25,148 mln. təşşkil edir. Azərbaycanın layihədə payı isə əvvəl 2,69 mln. dollar təşkil edirdi. Hökumət maliyyələşdirmə üçün OPEC fondunun vəsaitlərinin də ($7,9 mln.) cəlb olunmasından imtina edib. Belə ki, fond Azərbaycanın illik faiz dərəcəsini 0,75 faizdən 5 faizə qədər artırıb. Nəticədə hökumət bu məbləğin Dövlət büdcəsi hesabına təmin olunması barədə qərar qəbul edib.
Layihə çərçivəsində 10 mln. dollar meliorasiya, 6 mln. su istifadəçiləri assosiasiyasının yaradılması, 4,8 mln. dollar kreditləşmə, qalan məbləğ isə işçi qrupunun saxlanılmasına yönəldiləcək.
