Azərbaycan, Bakı / Trend müxbir U.İsmaylova/ Neft qiymətlərinin artmasına təsir edən amillərdən biri də Çinin iqtisadi inkişaf tempidir. Bu barədə cümə günü Bakıda USAID-in baş məsləhətçisi Arnold Qarberqer bildirib.
"Bu ölkə son zamanlar yüksək sürətlə inkişaf edir, avtomobil sayının artımı ildə 1 mln. təşkil edir" - deyə Qarberqer bildirib.
Onun sözlərinə görə, neft tələb olunan məhsuldur və Çinin yanacağa olan yüksək tələbatı neft qiymətlərinin artmasına təsir edir.
Dünya bazarında neftin qiymətləri 1 barrel üçün 100 dollar səviyyəsinə çatıb.
Beynəlxalq inkişaf üzrə ABŞ Agentliyi USAID - bilavəsitə ABŞ dövlət katibinin idarə etdiyi müstəqil hökumət təşkilatıdır.
Agentliyin fəaliyyəti ABŞ-ın beynəlxalq maraqlarının qorunmasına və inkişafda olan ölkələrdə əhalinin həyat səviyyəsinin keyfiyyətinin və səviyyəsinin yüksəldilməsinə yönəldilib. Agentlik bu ölkələrdə demokratiyanın və azad bazarın inkişafına kömək edir.