Azərbaycan, Bakı, 09 oktyabr / Trend / SOCAR Xəzər Dəniz Neft Donanmasının Xəzər dənizində ixtisaslaşmış ən iri "İsrafil Hüseynov" boruçəkən gəmisini təmir edir, - SOCAR-ın məlumatında deyilir.
Təmir işlərinin birinci mərhələsi sentyabrın 25-də başa çatıb. Təmir şirkətin gəmi təmiri zavodunda aparılıb. Burada gəminin su altında qalan hissəsi təmizlənib və xüsusi korroziyaya qarşı boya ilə rənglənib. Beş elektrik mühərrikində də təmir işləri görülüb.
Gəmi Heydər Əliyev adına Dərin Özüllər Zavonundadır. Burada təmir işlərinin ikinci mərhələsi görüləcək.
Gəmi Xəzər dənizinə 1989-cu ildə gətirilib. Məhz o, "Azəri-Çıraq-Günəşli" və "Şahdəniz" yataqlarından Səngəçal neft terminalına neft və qaz boru kəmərlərinin çəkilməsi işlərini görüb.
Gəminin çəkisi 14 min ton, uzunluğu 146 metr, hündürlüyü 50 metrdir. Gəmi sutka ərzində suyun 10-300 metr dərinliyində 2-2,5 km boru çəkmək gücünə malikdir.