Azərbaycan, Şəki, 13 yanvar/ Trend , müxbir X.Əliyeva/ "2009 - cu ildə "Azəriqaz" QSC uzunluğu 20 km olan Cəfərabad - Şəki magistral qaz kəməri və Şəki şəhərində 18 km uzunluğunda şəhərdaxili qaz kəmərini yenidən qurmaq niyyətindədir", - Şəki Qaz İstismarı İdarəsinin rəisi Adil Mustafayev bildirib.
"əhalisi 10 min nəfərdən çox olan Göynük kəndinin qazlaşdırılması da təmin ediləcək", - Mustafayev vurğulayıb.
Onun sözlərinə görə, Şəkidə qaza olan sutkalıq tələbat 255 min kubmetrdir. Tələb olunan limit rayona tam verilir. Bununla yanaşı, qazdan istifadəyə görə ödəniş təxminən 50 faiz təşkil edir.
"Özəl və büdcə təşkilatlarına verilən qazın dəyərinin tam ödənişi təmin olunsa da, əhalinin ödənişləri ilə bağlı problemlər mövcuddur. Ötən ay yanacağın dəyərinin yalnız 55 faizi ödənilib. Yığımların faizi artmazsa, rayona qazın verilişi dayandırıla bilər", - Mustafayev vurğulayıb.
Şəkidə qazpaylayıcı stansiya abonentlərinin verilmiş qaza görə bu stansiyalara 600 min manat borcu var. Bütün borclar əhali sektoruna aiddir. Şəki rayonunda 14 min abonent var.
Şəki Azərbaycanın Şimal-Qərb regionunda, Bakıdan 352 km məsafədə yerləşir.
Müəlliflə əlaqə saxlamaq üçün elektron ünvan: [email protected]
