Azərbaycan, Bakı, 22 yanvar/ Trend , müxbir E.İsmayılov/ Abunəçilərin dəm qazından zəhərlənməsi hallarının verilən yanacağın tərkibinə aidiyyatı yoxdur. Bu barədə cümə axşamı "Bakqaz" İstehsalat Birliyinin (Bakıda qaz bölgüsü ilə məşğul olur) rəhbəri Tahir Əliyev bildirib.
Onun sözlərinə görə, "dəm qazından zəhərlənmənin qazın tərkibi ilə əlaqədar olması barədə fikirlər tamamilə yanlışdır".
Əliyev bildirib ki, qaz abunəçilərə standartlara müvafiq verilir. Qaz, onu şəxsi vəsaitləri hesabına yataqlarından hasil edən SOCAR-dan alınır və daha sonra istehlakçılara satılır. Hasil edilən qazın tərkibi SOCAR-ın tərkibinə daxil olan "Neftqazlayihə" İnstitutunda yoxlanılır, bundan sonra onun keyfiyyətinə dair sertifikat verilir.
"Abunəçilərə satılan qaz Bakı Qaz Emalı zavodunda, həmçinin, qazpaylayıcı stansiya separatorlarında dəfələrlə təmizləmədən keçir", - deyə İB-nın rəhbəri bildirib.
Onun sözlərinə görə, dəm qazının yığılmasının səbəbi, hansı ki, nəticədə zəhərlənmə baş verir, başqadır.
"Söhbət təkcə standartlara uyğun olmayan cihazlardan getmir. Ola bilsin ki, cihaz standartlara cavab verir, lakin tüstüçəkən sistemin düzgün olmaması dəm qazının yaranmasına gətirib çıxarır", - deyə Əliyev bildirib.
Onun sözlərinə görə, qaz plitələrində qazın maksimum səviyyədə yandırılması təhlükəlidir. "Belə olan halda, qaz sonadək yana bilmir və dəm qazı əmələ gəlir", - deyə İB-nin rəhbəri bildirib.
Son vaxtlar Azərbaycanda dəm qazından təqribən 200 nəfər zəhərlənib.
Məqalə müəllifi ilə əlaqə ünvanı - [email protected]
