Azərbaycan, Bakı, 20 may / Trend , müxbir E.İsmayılov /
SOCAR-ın Avstriya nümayəndəliyinin əsas məqsədlərindən biri Avropanın neft-qaz bazarının bütün seqmentlərinin öyrənilməsindən ibarətdir. Bu barədə SOCAR-ın Avstriya nümayəndəliyinin rəhbəri Gülmirzə Cavadov deyib.
"İlk öncə Azərbaycanın bu və ya digər layihələrdə iştirak edə bilməsi üçün müvafiq bazarlar öyrənilir. Hazırda hər hansı bir dəqiq layihənin adını çəkə bilməsəm də, SOCAR-ın investisiya yatıra biləcəyi bazarın bütün seqmentləri öyrənilir", - Cavadov qeyd edib.
Nümayəndəlilyin başlıca məqsədi Azərbaycanla Avstriyanın neft-qaz sektoru arasında əlaqələndirici halqanın yaradılmasından, ən əsası isə Avstriyanın ən iri neft-qaz şirkəti OMV ilə əlaqə yaratmaqdan ibarətdir. "OMV bizdən ötrü ən vacib tərəfdaş şirkətdir", - Cəfərov deyib. OMV "Nabukko" qaz kəməri layihəsində iştirak edir.
Avstriyadakı nümayəndəlik Avstriya ilə birgə Sloveniya, Slovakiya və ətraf sərhədyanı ölkələrlə iş apardığından regional əhəmiyyət kəsb edir.
SOCAR-ın Avstriya nümayəndəliyi həmçinin, Avstriyada xüsusi treninqlərin keçirilməsi imkanlarını da nəzərdən keçirir. Hazırda bu məsələ araşdırılır.
Məqalə müəllifi ilə əlaqə ünvanı: [email protected]
