Azərbaycan, Bakı, 02 may / Trend , müxbir А.Bədəlova /
"Qazaxıstanın "Tengiz" yatağından çıxarılan neftin SOCAR-ın Kulevidəki Qara dəniz terminalı vasitəsilə ixracı 2009-cu ilin avqustunda başlaya bilər", - çərşənbə axşamı Trend -a Tengizchevroil birgə müəssisəsinin marketinq və nəqliyyat şöbəsinin kommersiya meneceri Daq Şoen deyib.
"Dəniz dibinin dərinləşdirilməsi işinin başa çatması şərti ilə tədarük avqustda başlaya bilər", - Şoen bildirib.
Onun sözlərinə görə, qarşıdakı bir neçə ay ərzində Tengizdən Azərbaycana dəmiryol vasitəsilə neft nəqlinin həcmi ayda 200 min tona qədər artacaq.
Bakı-Tbilisi-Ceyhan boru kəməri ilə nəql olunan neftin həcmi sutkada 5 min tondur.
Kulevidəki neft terminalı ötən il mayın 16-da istifadəyə verilib.
Terminalın ümumi buraxılış gücü ildə 10 milyon ton neft məhsuludur. Buraya 3 milyon ton neft, 3 milyon ton dizel yanacağı, 4 milyon ton mazut daxildir. O, eyni zamanda 168 vaqon-sistern qəbul edə bilər. Rezervuar parkının ümumi həcmi 320 min kubmetrdir. İki il ərzində terminalın buraxılış gücünün 15-20 milyon tona qədər artırılması gözlənilir.
Bu gün Tengizchevroil öz neftini Bakı-Tbilisi-Ceyhan boru kəməri ilə Türkiyədə Aralıq dənizinə və dəmiryol vasitəsilə Gürcüstanın Qara dəniz limanı Batumiyə nəql edir.
Məqalə müəllifi ilə əlaqə ünvanı: [email protected]