Azərbaycan, Bakı, 07 avqust / Trend , müxbir E.İsmayılov /
"Ekol mühəndislik xidmətləri" QSC Vyetnamda yığılmış neft şlamlarının təmizlənməsi üzrə Azərbaycan-Vyetnam birgə müəssisənin yaradılması çərçivəsində Vyetnam tərəfi ilə danışıqlar aparır. Bu barədə cümə günü QSC-dəki mənbədən məlumat verilib.
"Bu istiqamətdə işlər davam etdirilir. Hazırda birgə müəssisənin (BM) yaradılması barədə danışıqlar aparılır. Hələ ki, hər şey danışıqlar mərhələsindədir", - mənbədən bildirilib. Yeni BM-in mümkün yaranma müddətini mənbə açıqlamayıb.
Bir müddət əvvəl "Ekol" və Vyetnamın "Vimexo" şirkəti Vunq Tay (Vyetnam) şəhərində əməkdaşlıq barədə müqavilə imzalayıb. Müqaviləyə əsasən, ən qısa müddətdə işçi qrupunun yaradılması nəzərdə tutulur. Müqavilə həm Vyetnam, həm də Azərbaycan mütəxəssislərinin bilavasitə iştirakı əsasında, "PetroVyetnam" dövlət şirkəti və "Ekol" QSC-nin təsisçiliyi ilə BM-in yaradılmasını nəzərdə tutur. BM Vyetnam ərazisində yığılmış neft şlamların, çirklənmiş suların və sənaye tullantılarının emalı ilə məşğul olacaq. Müqavilədə Vyetnamın neft sənayesində istifadə olunan avadanlıq təminatı, Bakıda yaşıllıqların salınması, Vunq Tay şəhərindəki Bakı küçəsində "Bakı" adlı restoranın açılması məsələləri də qeyd olunub.
Apreldə "Vimexo" şirkətinin nümayəndələri Bakıda rəsmi səfərdə olublar və reallaşdırılan "Ekol" QSC layihələri ilə tanış olublar.
Abşeron yarımadasında mövcud olan ekoloji problemlərin həlli üçün 2006-ci il martın 1-də yaradılan "Ekol Mühəndislik xidmətləri" QSC-nin həmtəsisçiləri ARDNŞ (Azərbaycan Respublikası Dövlət Neft Şirkəti) (51 faiz) və Lancer S.A. Services şirkətidir (49 faiz).
Məqalə müəllifi ilə əlaqə ünvanı: [email protected]
