Azərbaycan, Bakı, 02 sentyabr / Trend , müxbir E.İsmayılov /
ARDNŞ yeni normativ sənədlərdə Heydər Əliyev adına Neft Emalı Zavodunun istehsalı olan naften turşularının nəzərdə tutulan keyfiyyət standartlarını gözdən keçirir. Bu barədə çərşənbə günü həmin normativ sənədləri hazırlayan Y.H.Məmmədəliyev adına Neft-Kimya Prosesləri İnstitutundan deyilib.
Məhsulun buraxılması barədə hazırlanmış normativ sənəd həmin məhsulun istehsalı üçün müvafiq keyfiyyət göstəricilərini nəzərdə tutur. "Bu normativ sənəd artıq bütün müvafiq nazirliklərdə, o cümlədən Ekologiya, Səhiyyə və Fövqəladə Hallar nazirliklərində gözdən keçirilib. Hazırda bu sənədə Dövlət Neft Şirkətində baxılır", - mənbədən deyilib.
Naften turşuları polimerlərin, boyaq maddələrinin, kauçukun həlledicisi və lakın komponenti kimi antiseptik vasitə, çap boyalarına və motor yanacaqlarına əlavə olaraq istifadə edilir.
Naften turşuları NEZ-də dizel və reaktiv yanacaqların qələvilərlə emalı nəticəsində alınır.
Naften turşuları neftin tərkibində də olur, lakin onların miqdarı azdır (kütlədə 0,01 faizdən 2-3 faizədək). Azərbaycan nefti, həmçinin Venesuela, Rumıniya və ABŞ neftinin bəzi növləri naften turşuları ilə zəngindir.
Məqalə müəllifi ilə əlaqə ünvanı: [email protected]
