Azərbaycan, Bakı, 3 may /Trend, müxbir E.İsmayılov/
Azərbaycanın "Azəri-Çıraq-Günəşli" (AÇG) dəniz yataqları blokunda neft hasilatının artırılması - "Chirag oil project" çərçivəsində qabaqlayıcı quyunun qazılması üçün zəruri olan dayaq plitəsinin inşası üzrə işlər tamamlanma mərhələsindədir. Bu barədə bazar ertəsi ARDNŞ-dəki (Azərbaycan Respublikası Dövlət Neft Şirkəti) mənbə məlumat verib.
"Plitənin inşası çərçivəsində işlər hələ ki davam etdirilir, lakin mayın 21-dək başa çatacaq", - mənbə bildirib.
20 quyunun qazılması üçün nəzərdə tutulan plitənin inşası üzrə işləri "BosShelf" şirkəti ilə Heydər Əliyev adına Dərin Özüllər Zavodu (ARDNŞ-nin tərkibinə daxildir) ilə birgə aparılır. Zavod bu layihə çərçivəsində payına düşən işləri artıq başa çatdırıb. İndi dayaq plitəsinin tikintisi üzərində işləri "BosShelf" şirkəti aparır.
Mənbənin sözlərinə görə, "BosShelf" bilavasitə plitə üzərində işləri tamamlayıb. Tezliklə orada zəruri avadanlıqların quraşdırılmasına başlanılacaq.
Əvvəllər AÇG-nin operatoru olan ВР-nin sifarişi ilə "BosShelf" "McDermott Caspian Contractors" şirkəti ilə birgə bu yataqların işlənməsi çərçivəsində altı platforma tikib.
Layihə dənizin 170 metr dərinliyində, artıq işləyən hasilat platformaları "Çıraq" və "Günəşli" arasındakı yeni "Qərbi Çıraq" platformasının quraşdırılmasını nəzərdə tutur. "Chirag oil project" çərçivəsində tikinti işlərinin əksəriyyəti Azərbaycanda, qarşıdakı layihələr üçün platformaların qazma modullarının inşası isə xaricdə həyata keçirilir.
"Chirag oil project" üçün altı milyard dollar həcmində investisiya nəzərdə tutulur.
AÇG-də neft hasilatının artırılması çərçivəsində "Azeri Light" markalı neft hasilatının planlaşdırılan gündəlik həcmi 183 min barel təşkil edir. Yeni platformadan hasil olunacaq səmt qazının gündəlik həcminin 6,5 minlyon kubmetr təşkil edəcəyi gözlənilir. Platformadan laya vurulacaq qazın gündəlik həcmi isə 2,3 milyon kubmetr təşkil edəcək.
Layihə çərçivəsində qabaqlayıcı qazma işləri 2010-cu ilin ikinci yarısını - 2012-ci ilin birinci yarısını əhatə edəcək. Qazma "Dədə Qorqud" qurğusu vasitəsilə həyata keçiriləcək. Platformadan hasilata 2013-cü ilin sonlarında başlamaq planlaşdırılıb.
Ümumilikdə layihənin reallaşdırılması çərçivəsində (AÇG üzrə müqavilənin başa çatacağı 2024-cü ilin sonunadək) 300 milyon barel neftin hasil olunması planlaşdırılır.
"Azəri-Çıraq-Günəşli" yataqlar blokunun səhmdarları bunlardır: BP (operator - 34,1%), "Chevron" (10,2%), ARDNŞ (10%), INPEX (10%), "StatoilHydro" (8,6%), "ExxonMobil" (8%), TRAO (6,8%), "Devon" (5,6%), ITOCHU (3,9%), "Hess" (2,7%).
