Azərbaycan, Bakı, 12 iyul /Trend/
Avqustda Bakı-Tbilisi-Ceyhan (BTC) neft boru kəməri ilə 23,3 milyon barel Azərbaycanın yüngül neftinin göndərilməsi planlaşdırılıb. Bu göstərici ötən ilin avqustunda 25,3 milyon barel olub. Bu barədə bazar ertəsi neft-qaz bazarındakı mənbə bildirib.
BTC ilə orta hesabla cari ilin avqustunda 743 min barel neftin nəql edilməsi planlaşdırılıb.
BTC neft kəmərinin ümumi uzunluğu 1 768 km-dir. Bunun 443-ü Azərbaycan, 249-u Gürcüstan, 1 076 km-i isə Türkiyə ərazisindən keçir. Boru kəmərinin tikintisi 2003-cü ilin aprelində, onun neftlə doldurulması isə 2005-ci il mayın 18-də başlayıb.
BTC-nin tikintisi dörd milyard dollara başa gəlib. Maliyyə xərcləri və bank faizlərinin ödənilməsi bura daxil deyil. Maliyyə kreditinin ümumi məbləği 2,6 milyard dollar təşkil edir.
"BTC Co"nun səhmdarları bunlardır: bp (30,1 faiz); AzBTC (25 faiz); "Chevron" (8,90 faiz); "Statoil" (8,71 faiz); ТРАО (6,53 faiz); "Eni" (5 faiz); "Total" (5 faiz); "Itochu" (3,40 faiz); "Inpex" (2,50 faiz); "ConocoPhillips" (2,50 faiz) və "Amerada Hess" (2,36 faiz).
