Azərbaycan, Bakı, 21 iyul /Trend, müxbir E.İsmayılov/
ARDNŞ (Dövlət Neft Şirkəti) "8 Mart" dəniz yatağında yeni yüksəkdebitli istismar quyusunun qazılması çərçivəsində karbohidrogen əsaslı qazma məhlulunun saxlanması üçün avadanlığın quraşdırılmasını həyata keçirir, - çərşənbə gün ARDNŞ-dəki mənbə məlumat verib.
"İndi quyuda qazma işləri dayandırılıb, çünki karbohidrogen əsaslı qazma məhsulunun saxlanması üçün zəruri avadanlığın quraşdırılması üzrə iş aparılır", - mənbə deyib.
Onun sözlərinə görə, hazırda quyunun dərinliyi 3100 metrdir, bu dərinlikdə də polad borunun quyuya salınması həyata keçiriləcək. Quyunun layihə dərinliyi 5800 metr təşkil edir.
Bundan əvvəl mənbə xəbər verib ki, quyu bu ilin sonları-gələn ilin əvvəllərində istismara veriləcək.
Quyunun gözlənilən sutkalıq debiti 350 min kubmetrə yaxın qaz və 40 ton kondensat təşkil edir.
Hazırda "8 Mart" yatağından sutkada 400 min kubmetrdən artıq qaz hasil olunur. Şirkətin geoloqları artıq gələcək qazma üçün 9 nöqtə müəyyən ediblər. Bu barədə ARDNŞ-in məlumatında deyilir.
Azərbaycanda 59 neft-qaz yatağı var ki, onların 18-i dənizdə, yerdə qalanları quruda yerləşir.