Azərbaycan, Bakı, 4 avqust /Trend/
ARDNŞ (Azərbaycan Respublikası Dövlət Neft Şirkəti) yanvar-iyul aylarında Rusiyaya 494,6 milyon kubmetrdən çox qaz ixrac edib. Bu barədə ARDNŞ-nin çərşənbə günü yaydığı məlumatda deyilir.
Məlumatda deyildiyi kimi, iyulda Rusiyaya 66,4 milyon kubmetrdən çox qaz ixrac edilib. İyunda bu rəqəm 81,54 milyon kubmetr olub.
Azərbaycan qazının Rusiyaya alqı-satqısı üzrə ortamüddətli müqavilə oktyabrın 14-də Bakıda imzalanıb. 2010-2014-cü illəri əhatə edən müqavilə ARDNŞ (Azərbaycan Respublikası Dövlət Neft Şirkəti) ilə "Qazprom" şirkəti arasında imzalanıb. Müqaviləyə uyğun olaraq, Azərbaycan tərəfi hər il Rusiyaya 500 milyon kubmetrdən az olmayaraq qaz tədarük edəcək. Müqavilədə tədarük həcminin həddi göstərilməyib. ARDNŞ tədarük edə biləcəyi həcm barədə yarım il əvvəldən qarşı tərəfi xəbərdar edəcək.
Azərbaycan qazının Rusiyaya nəqli 2010-cu ilin yanvarından başlanılıb. Bu il Rusiyaya bir milyard kubmetr Azərbaycan qazı ixrac olunacaq. Həmçinin, ARDNŞ və "Qazprom" 2011-ci ildə Rusiyaya nəql ediləcək qazın həcmi barədə razılığa gəliblər. Növbəti ildə bu göstərici təxminən iki milyard kubmetr təşkil etməlidir.
