Türkmənistan, Aşqabad, 10 sentyabr /Trend, müxbir H.Həsənov/
Hindistan Türkmənistan-Əfqanıstan-Pakistan-Hindistan (TAPI) qaz kəməri layihəsinin həyata keçirilməsi üzrə Türkmənistanın mövqeyini dəstəkləyir. Bunu Hindistanın Baş naziri Manmohan Sinq telefon danışığı zamanı Türkmənistan Prezidenti Qurbanqulu Berdiməhəmmədova deyib.
Türkmənistan hökumətinin mətbuat xidmətindən verilən məlumata görə, Hindistan Baş nazirinin fikrincə, bu layihə nəinki iştirakçı ölkələrin gələcək sosial-iqtisadi inkişafı üçün şərait yaradacaq, eləcə də real əməkdaşlıq xətti ilə regionda sabitlik və sülhün möhkəmləndirilməsinə güclü təkan olacaq.
Sinq həmçinin qeyd edib ki, Hindistan TAPI-nin inşasına böyük əhəmiyyət verir və bütünlükdə regionda müsbət tərəfdaşlığın möhkəmlənməsi işində, layihənin uğurla həyata keçirilməsi və inkişafı üçün birgə səylər göstərməyə hazırdır.
