Azərbaycan, Bakı, 15 sentyabr /Trend, müxbir E.İsmayılov/
Xəzərin Azərbaycan sektorunda yerləşən "Şahdəniz" qaz-kondensat yatağında beşinci hasilat quyusu cari ilin dekabr ayında istismara veriləcək. Bu barədə çərşənbə günü ARDNŞ-dən verilən məlumatda deyilir.
"Dekabrda daha bir quyu istismar ediləcək", - ARDNŞ nümayəndəsi deyib.
Hazırda quyunun dərinliyi 6 min metr, layihə dərinliyi isə 7 min metr təşkil edir.
Hazırda yataqda dörd hasilat quyusunun sutkalıq debiti 22-23 milyon kubmetr qaz səviyyəsindədir.
"Şahdəniz" yatağı üzrə müqavilə 1996-cı il iyunun 4-də imzalanıb. Müqavilə iştirakçıları bunlardır: BP (operator) - 25,5%, "Statoil" - 25,5%, NICO - 10%, "Total" - 10%, "LukAgip" - 10%, TPAO - 9%, ARDNŞ - 10%.
Hazırda qaz "Cənubi Qafqaz" qaz kəməri üzrə Gürcüstan və Türkiyəyə nəql olunur.
Bu il yataqda 7,84 milyard kubmetr qaz hasil edilməsi nəzərdə tutulub. Yataqda hasilatın ən yüksək həddi 8,6 - 9 milyard kubmetr həcmində nəzərdə tutulur. Proqnozlara görə, yatağın işlənməsinin ikinci mərhələsi çərçivəsində qaz hasilatının həcmini ildə 25 milyard dollara qədər artırmaq mümkün olacaq.
