Azərbaycan, Bakı, 7 oktyabr /Trend, müxbir N.İsmayılov/
ARDNŞ Almaniyanın "RWE" şirkəti ilə perspektivli "Naxçıvan" strukturu üzrə tərəflər arasında imzalanan qarşılıqlı anlaşma memorandumu çərçivəsində kommersiya, hüquqi və texniki məsələlərlə bağlı danışıqları davam etdirir. Bu barədə cümə axşamı ARDNŞ-nin yüksəkvəzifəli nümayəndəsi deyib.
"Hazırkı mərhələdə biz kommersiya, hüquqi və texniki danışıqlar aparırıq", - ARDNŞ nümayəndəsi bildirib.
Perspektivli "Naxçıvan" strukturu üzrə qarşılıqlı anlaşma haqqında memorandum şirkətlər arasında cari il martın 10-da imzalanıb. Bir il ərzində şirkətlər PSA tipli müqavilənin hazırlanması üçün bütün zəruri işləri görməlidirlər.
ARDNŞ nümayəndəsinin dediyinə görə, yeni müqavilənin hazırlanması çərçivəsində memorandumun müddəti başa çatana qədər işlər sona yetməyəcəyi təqdirdə, bu müddət uzadıla bilər. Onun sözlərinə görə, bunlar kommersiya məsələləridir və burada işlərin qəti olaraq vaxtında başa çatdırılması məqsəd kimi qarşıya qoyulmur. "Biz nə tərəfdaşlarımızı, nə də özümüzü məhdudlaşdırmadan, bu işi sərbəst şəkildə davam etdiririk", - ARDNŞ nümayəndəsi qeyd edib.
Strukturun ehtiyatları 300 milyard kubmetr qaz və 40 milyon ton kondensat həcmində proqnozlaşdırılır.
Perspektivli "Naxçıvan" strukturunun işlənməsi üzrə birinci müqavilə 1997-ci ilin avqustun 1-də imzalanıb. Layihə iştirakçıları bunlardır: ExxonMobil - 50 faiz, ARDNŞ - 50 faiz.
Müqavilə karbohidrogenlərin həcminin kommersiya baxımından cəlbedici olmadığının aşkarlanması səbəbindən bağlanıb.