Türkmənistan, Aşqabad, 18 oktyabr /Trend, müxbir H.Həsənov/
1990-cı ildən etibarən BƏƏ-nin "Dragon Oil" şirkəti Xəzərin Türkmənistan sektorunda neft layihəsinə 1,6 milyard dollar yatırıb. Bu barədə bazar ertəsi şirkətin press-relizində deyilir.
Fəaliyyət Cənubi Xəzər hövzəsinin şərq sektorunda 80 milyon ton neft və 88 milyard kubmetr təbii qaz ehtiyatına malik "Çeleken" müqavilə zonasında aparılır.
Müqavilə imzalanan anda quyudan hasil edilən məhsulun həcmi orta hesabla sutkada 900 ton neft (1999), 2009-cu ilin sonuna isə orta sutkalıq hasilat 6500 ton neft təşkil edib.
2010-cu ilin birinci yarısında "Dragon Oil"un gəlirləri ötən ilin müvafiq dövrü ilə müqayisədə 31 faiz artıb. Bununla yanaşı, neftin orta sutkalıq istehsalı səkkiz faiz artıb.
"Dragon Oil" bu dövr ərzində 2009-cu ildəki 105 milyona nisbətdə 137,6 milyon məbləğində gəlir əldə edib. Şirkət bu göstəriciləri neft bazarında qiymət artımı ilə əlaqələndirir.
Eyni zamanda, 2010-cu ilin birinci yarısında orta sutkalıq neft hasilatı göstərilən dövrdə 46,42 barel təşkil etdiyi halda, bir il bundan əvvəl sutkada 42,808 barel hasil edilib. Neft nəqli Bakı limanı vasitəsilə həyata keçirilib. Müvafiq müqavilə 2010-cu ilin iyununda imzalanıb.
Türkmənistan hökuməti ilə PSA tipli (məhsulun pay bölgüsü) saziş 1999-cu ildə imzalanıb. Müqavilə ərazisinin ümumi sahəsi 950 kvadratmetrdir. Bura "Ceytun", "Ciqalıbek" və Çelekenyanqummez" yataqları daxildir.
Layihə həyata keçirilməyə başlanandan 40-dan çox yeni quyu istismara verilib, 10-dan çox dəniz platforması bərpa edilib və tikilib, 80 km-dən çox boru kəməri çəkilib, ixrac imkanları genişləndirilib, əlavə neft anbarları tikilib, eyni vaxtda iki tankerin doldurulması mümkün olub.
Plana əsasən, uzunluğu 40 km olan magistral boru kəmərinin tikintisini başa çatdırmaq, mədənin istehsal qurğularını sutkada 75 000 barel neftə və 220 milyon kubmetr qaza qədər artırmaq lazımdır.