Azərbaycan, Bakı, 20 oktyabr /Trend, müxbir E.İsmayılov/
Azərbaycan elektrik stansiyasının faydalı təsir əmsalı (FTƏ) üzrə Avropada lider mövqelərdən birini tutur. Bu barədə çərşənbə günü "Azərenerji" SC-nin rəhbəri Etibar Pirverdiyev deyib.
Onun sözlərinə görə, hər bir eletrik stansiyası və enerji sisteminin öz FTƏ-si var və Azərbaycan elektrik stansiyaların FTƏ-si üzrə hər bir saat elektrik enerjisi üçün sərf olunan yanacaq sərfinə görə, Avropada qabaqcıl yerlərdən birini tutur. Bu, ölkənin enerji sektoruna yatırılan investisiyalar nəticəsində aparılan yenidənqurma işləri sayəsində mümkün olub.
Pirverdiyevin sözlərinə görə, respublika öz enerji sistemi qurğularının yenidənqurulması üzrə MDB ölkələri arasında lider mövqeyə sahibdir.
Ölkənin enerji qurğularının yenidənqurulması üzrə işlər davam etdirilir. Pirverdiyevin sözlərinə görə, məsələn, mövcud Şirvan elektrik stansiyası (50 ildən çoxdur istismar olunur) yaxınlığında yeni elektrik stansiyasının tikintisi üzrə işlər aparılır. Yeni qazturbinli "Cənub" stansiyasının gücü 800 meqavat təşkil edəcək. Bu stansiyanın digər qazturbinli stansiyalardan başlıca fərqləndirici cəhəti budur ki, o, üç yanacaq növü - qaz, dizel və mazutla işləyə biləcək.
Stansiyanın tikintisini 2011-ci ilin sonunadək başa çatdırmaq planlaşdırılır.
SC rəhbərinin sözlərinə görə, yarımstansiyaların yenidənqurulması üzrə işlər də görülür. Böyükşor yarımstansiyasının tikintisi planlaşdırılır və bunun üçün büdcədən vəsaitlər ayrılıb.
"Yeni yarımstansiya tikildikdən sonra Xırdalan yarımstansiyasının yüklənməsi, demək olar, iki dəfə azalacaq", - Pirverdiyev qeyd edib.
