Azərbaycan, Bakı, 15 iyun /Trend, müxbir A.Bədəlova/
Transadriatik boru kəməri (ТАР) 2013-cü ildə layihə üzrə investisiya qərarının qəbul edilməsini gözləyir. Bu barədə Trend-ə müsahibəsində ТАР layihəsinin idarəedici direktoru Kyetil Tunqlend bildirib.
"ТАР layihəsi üzrə yekun investisiya qərarı 2013-cü ildə "Şahdəniz" layihəsi üzrə investisiya qərarı ilə paralel qəbul olunacaq", - Tunqlend deyib.
ТАР-ın tikintisinə də 2013-cü ildə başlanacağı gözlənilir. Bununla belə, Tunqlendin sözlərinə görə, boru kəmərinin inşası müddəti də "Şahdəniz" layihəsi konsorsiumunun qərarından asılıdır.
"Boru kəmərinin tikintisi 3 ilə yaxın vaxt aparacaq. Hazırda ТАР tikintiyə "Şahdəniz" yatağının işlənməsinin ikinci mərhələsində ilk qazı almağa hazır olmaq üçün 2013-cü ildə başlamağı planlaşdırır", - Tunqlend deyib.
Xəzərin Azərbaycan sektorundakı "Şahdəniz" qaz-kondensat yatağının işlənməsi üzrə konsorsium bu il oktyabrın 1-dək bütün boru kəməri qruplarından yatağın irimiqyaslı işlənməsi çərçivəsində qaz nəqli üzrə konkret təkliflər gözləyir.
Tunqlendin sözlərinə görə, ТАР layihənin texniki dizaynı, bütün planlar və müddətlər üzrə məlumatın verilməsi məsələsində "Şahdəniz" layihəsi konsorsiumu ilə işləyir.
"Oktyabrın 1-i bütün təkliflərin verilməsi üzrə son müddətdir və buraya təkcə tariflər deyil, həm də bütün boru kəmərlərinin kommersiya, maliyyə və texniki yaşamaq qabiliyyəti haqqında məlumat daxildir. Və biz bu müddətə uyğun hərəkət etmək fikrindəyik. Biz habelə konsorsiumla ["Şahdəniz"] onların gözləntilərinə tam uyğunluğu təmin etmək üçün sıx dialoqu davam etdirəcəyik", - Tunqlend deyib.
Onun sözlərinə görə, "Şahdəniz" layihəsi tərəfdaşlarının təkliflərinin verilməsi bu il TAP üçün nisbətən mühüm addım olacaq.
Nəzərdə tutulan müddətdə boru kəmərinin tikintisinə başlamaq üçün cari ildə bir sıra tədbirlərin yerinə yetirilməsi lazımdır. Həmçinin, ilin sonunadək ətraf və sosial mühitin təsirinin qiymətləndirilməsinin aparılması və onun nəticələri üzrə yekun məruzənin təqdim edilməsi də planlaşdırılır.
Transadriatik boru kəməri ilə nəql üzrə tariflərdən danışarkən Tunqlend bildirib ki, digər boru kəməri layihələri ilə müqayisədə TAP-ın dəyərinin aşağı olacağını nəzərə alaraq, layihə daha sərfəli tariflər təklif edə biləcək.
"Hazırkı məqamda layihənin dəyərinə yenidən baxılır. Və əgər hətta dəyər əvvəl elan edildiyindən yuxarı olarsa, o, digər boru kəməri layihələri arasında ən aşağı olacaq", - Tunqlend bildirib.
Bu gün TAP layihəsinin dəyəri 1,5 milyard avro qiymətləndirilir.
Transadriatik boru kəməri öz başlanğıcını Yunanıstandan götürəcək, Albaniya ərazisindən və Adriatik dənizindən keçəcək, daha sonra İtaliyayadək uzanacaq. Qaz kəməri Albaniyadan İtaliyaya qədər 115 kilometrlik sualtı sahəyə qoşulub. Qaz kəmərinin tikilməsi üzrə layihənin dəyəri 2,2 milyard dollar təşkil edir. Kəmərin ilkin buraxılış qabiliyyəti ildə 10 milyard kubmetr, maksimum isə 20 milyard kubmetr təşkil edir.
Layihənin səhmdarları İsveçrənin EGL (42,5 faiz), Norveçin Statoil (42,5 faiz) və Almaniyanın E.ON Ruhrgas (15 faiz) şirkətləridir.
