Azərbaycan, Bakı, 27 iyul /Trend, müxbir S.Əliyev/
Xəzərin Azərbaycan sektorundakı "Azəri-Çıraq-Günəşli" yataqlar blokunun işlənməsi layihəsinin operatoru - BP şirkəti iyulun 10-dan platformadan neft hasilatının tam dayandırıldığı "Çıraq" platformasının quyularında geoloji-texniki profilaktik işləri başa çatdırıb. Bu barədə çərşənbə günü Trend-ə "BP Azerbaijan"dan deyiblər.
"Hazırda platformanın istismara verilməsi üzrə işə başlanılıb", - şirkətdən bildiriblər.
Hasilat dayandırılmamışdan əvvəl onun həcmi sutkada 90 min barelə yaxın olub.
"Çıraq" platformasında işlər başa çatdıqdan sonra analoji işlər "Azəri" (dörd platforma) yatağında quraşdırılan platformalarda aparılacaq. Bu işlərə də iki həftə vaxt lazım olacaq.
Bu uzunmüddətli dayanma, eləcə də təmir işləri nəticəsində cari il ərzində Azərbaycanda ümumi neft hasilatı proqnozlaşdırılan 52 milyon tondan təxminən 4 milyon ton azalacaq.
Yataqların işlənməsinə dair müqavilə 1994-cü ildə bağlanıb.
Hazırda müqavilədə iştirak payı bu şəkildə bölüşdürülüb: BP (operator - 35,83 faiz), "Chevron" (11,27 faiz), AzAÇG (11,6 faiz), "Inpex" (10,96 faiz), "Statoil" (8,56 faiz), "Exxon" (8 faiz), TPAO (6,75 faiz), "Itochu" (4,3 faiz), "Hess" (2,72 faiz).
2010-cu ildə "Azəri-Çıraq-Günəşli" yatağında 40,6 milyon ton neft hasil edilib. Bu göstərici 2009-cu ildə 40,3 milyon ton olub. 2010-cu ildə bu yataqlar blokunda sutkalıq orta hasilat 823,1 min barel təşkil edib.
