Azərbaycan, Bakı, 14 noyabr /Trend, müxbir A.Axundov/
Almaniyanın KfW İnkişaf Bankı Azərbaycanda bərpa olunan enerji mənbələrinin inkişafı layihəsinin texniki iqtisadi əsaslandırılmasının (TİƏ) hazırlanması üçün məsləhətçini müəyyən edib. Bu barədə çərşənbə günü Trend-ə bankın Bakı ofisindən məlumat veriblər.
Bank artıq TİƏ-nin hazırlanması üzərində işə başlayan Almaniyanın "MVV Decon" konsaltinq şirkəti ilə müqavilə bağlayıb.
"İşlər 12 ay davam edəcək. Əgər küləyin sürətinin əlavə ölçülməsinə ehtiyac yaranarsa, bu müddət 18 ayadək uzana bilər. TİƏ-nin birinci fazasının hazırlanması çərçivəsində layihənin texniki aspektləri işlənəcək, ikinci fazada isə ekoloji və sosial aspektlər öz həllini tapacaq", - bankın Bakı ofisindən bildiriblər.
Qeyd edək ki, bank bərpa olunan enerji mənbələrinin inkişafı üçün Azərbaycana 130 milyon avro ayırmağa hazırdır.
