Azərbaycan, Bakı, 11 dekabr /Trend, müxbir H.Vəliyev/
"Azəri-Çıraq-Günəşli" (AÇG) dəniz yataqları blokunun işlənməsi operatoru - BP şirkəti "Chirag oil project" (Azərbaycanın "AÇG" blokunda neft hasilatının artırılması) çərçivəsində platformanın dayaq blokunun tikintisini başa çatdırıb. Bu barədə çərşənbə axşamı Trend-ə şirkətdən məlumat verilib.
Bu, Xəzərdə ən ağır (18,2 min ton) blokdur. Blok oktyabrın 20-də Heydər Əliyev adına Bakı Dərin Özüllər Zavodundakı STB-1 barjına yüklənib.
Dayaq bloku ilin sonunadək barjda qalacaq ki, bu da hazırda quraşdırılma mərhələsində olan sualtı boru kəmərlərinin tikintisini başa çatdırmağa imkan verəcək.
Dənizdə dayaq blokunun quraşdırılmasına 2013-cü ilin əvvəlində başlamaq planlaşdırılıb.
Habelə, platformanın ATA konsorsiumu (AMEC-Tekfen-Azfen) tərəfindən həyata keçirilən üst hissəsinin tikintisi və quraşdırılması işlərinin təxminən 90 faizi başa çatıb. Onların 2013-cü ilin ikinci rübündə dənizə göndərilməsi planlaşdırılıb.
