Azərbaycan, Bakı, 13 avqust /Trend, müxbirlər S. Əhmədova, A.Bədəlova/
Avropa Komissiyası "Cənub qaz dəhlizi" üzrə tədarükün həcmlərinin artırılması üçün Azərbaycan və digər bütün cəlb edilmiş ölkələrlə işi davam etdirəcək ki, bu da Mərkəzi Avropadan Avstriyaya ikinci boru kəmərinin tikintisi imkanını yaradır.
Bu barədə Trend-ə müsahibəsində Aİ-nin xarici əlaqələr və təhlükəsizlik siyasəti üzrə ali nümayəndəsi Ketrin Eştonun sözçüsü Maya Koçiyançiç deyib: "Azərbaycanı bu prosesdə pioner adlandırmaq olar. Lakin Aİ-ni Türkiyə ilə birləşdirən "Cənub qaz dəhlizi" üçün Şərqi Aralıq dənizi, İraq və digər ölkələr kimi başqa əlavə potensial mənbələr də var.
Koçiyançiç vurğulayıb ki, Aİ "Cənub qaz dəhlizi" layihəsinin yekunlaşdırılmasında əhəmiyyətli addım olan "Trans Adriatik boru kəməri"nin tikintisi haqqında qərarı alqışlayır. Bu, Avropaya edilən qaz tədarükünün əhəmiyyətli dərəcədə şaxələndirilməsinə və Avropanın enerji təhlükəsizliyinin artmasına imkan yaradacaq.
Onun sözlərinə görə, Avropa Komissiyası, o cümlədən Mərkəzi Avropa bazarlarının yaxınlaşdırılması üçün Avropa İttifaqına üzv ölkələrlə sıx əməkdaşlıq edir.
Koçiyançiç bildirib: "Aİ-nin enerji bazarında lazımı infrastruktur və reversiv axınlar olduğu təqdirdə Aİ-yə tədarük edilən qaz Avropanın istənilən regionuna nəql oluna bilər".
