Azərbaycan, Bakı, 22 sentyabr /Trend, müxbir İlahə Məmmədli/
Almaniyanın "MVV decon" məsləhət xidməti 2015-ci ilin ortalarınadək Azərbaycanda bərpa olunan enerji mənbələrinin texniki-iqtisadi əsaslandırılması (TİƏ) layihəsinin hazırlanmasını başa çatdıracaq. Bu layihənin Almaniyanın "KfW" İnkişaf Bankının kreditləri hesabına reallaşdırılması planlaşdırılır.
Bu barədə bazar ertəsi Trend-ə KfW-in Bakı ofisindən bildiriblər.
Ofisdən deyilib ki, "KfW" bərpa olunan enerji parkının yaradılması üçün Azərbaycana 130 milyon avro ayırmaq niyyətindədir: "Həmin vəsait 100 meqavat gücündə külək-günəş enerji parkının tikintisi üçün kifayətdir".
Layihənin məqsədi ölkədə elektrik enerjisi istehsalının ümumi həcmində bərpa olunan enerji mənbələrinin xüsusi çəkisinin artımı, resurslardan uzunmüddətli və səmərəli istifadənin təminatıdır. Məsləhətçinin vəzifəsinə bərpa olunan enerji mənbələri sahəsində normativ-hüquqi bazanın hazırlanmasına dəstəyin göstərilməsi daxildir.
İlkin məlumatlara görə, KfW-nin krediti Pirəküşkül hava parkının yaradılmasına yönəldiləcək. Alternativ və Bərpa Olunan Enerji Mənbələri üzrə Dövlət Agentliyinin məlumatına görə, bu layihənin dəyəri 165 milyon avro həcmində qiymətləndirilir.
Layihənin yekun dəyəri TİƏ hazırlandıqdan sonra müəyyən ediləcək.
Layihə çərçivəsində baxılan əsas məsələlərdən biri bərpa olunan enerji mənbələrindən istehsal edilən elektrik enerjisinin tarifləridir.
