Azərbaycan, Bakı /müx. Trend S.Əliyev/ May ayının üçüncü ongünlüyündə "Şahdəniz" qaz yatağında növbəti quyu istismara veriləcək. Bundan sonra burada sutkalıq hasilat 10 mln. kubmetrə çatacaq. Hazırda isə müvafiq rəqəm 5,1 mln. kubmetrə bərabərdir. Bu barədə Nazirlər Kabinetindən verilən xəbərdə bildirilir.
Hazırda Azərbaycanın Dövlət Neft Şirkəti "Şahdəniz" layihəsi üzrə tərəfdaşları ilə buradan qaz hasilatının artırılması imkanlarını müzakirə edir. Güman olunur ki, "Mərhələ-1"də qazın illik hasilatı 1 mlrd. kubmetr artırıla bilər.
"Bu, quyunun debitinin artırılması hesabına edilə bilər" - deyə hökumətdən bildiriblər.
"Şahdəniz"də qaz hasilatının artırılması 2008-ci ildə baş verə bilər.
"Mərhələ-1" çərçivəsində "Şahdəniz"dən plato mərhələsində ildə 8,6 mlrd. kubmetr qaz hasil ediləcəyi gözlənilir. Hasilatın 1 mlrd. kubmetr artacağı təqdirdə tərəfdaşlar plato mərhələsində 9,6 mlrd. kubmetrədək qaz ala biləcəklər.
2007-ci ildə "Şahdəniz"dən 2,8 mlrd. kubmetr qaz hasil olunacaq.
Yanvar-aprel aylarında Azərbaycan "Şahdəniz"dən 281,58 mln. kubmetr qaz alıb (proqnozdan 25,9 faiz aşağı).
