Azərbaycan, Bakı / Trend / Bakı-Tbilisi-Ceyhan (BTC) boru kəməri layihəsinin reallaşdırılmasından Türkiyənin əldə etdiyi vəsaitlərin ümumi həcmi 500 mln. dollardan çoxdur. Bu barədə bu ölkənin Energetika və Təbii Ehtiyatlar Nazirliyinin məlumatında bildirilib.
BTC neft kəmərinin uzunluğu 1768 km təşkil edir. Bunun 443 km-i Azərbaycan, 249 km-i Gürcüstan, 1076 km-i Türkiyə ərazisindən keçir. Boru kəmərinin tikintisi 2003-cü ilin aprelində başlayıb, onun neftlə doldurulması 2005-ci il mayın 18-də baş tutub. Neft boru kəmərinin Gürcüstan və Türkiyə hissəsinə müvafiq olaraq 2005-ci ilin 10 avqust və 18 noyabr tarixlərində, Ceyhan terminalına qədər isə 28 may 2006-cı ildə çatıb.
Məlumatda qeyd olunub ki, hazırda boru kəmərinin gücü 90 faiz təşkil edir. Texniki işlər gələn il ötürücülük gücünün sutkada 1,2 mln. barrelədək artırmağa imkan verəcək.
BTC-nin tikintisi 4 milyard dollara başa gəlib. Bu tikinti işlərinə olan xərclərdir, boru kəmərinin doldurulması, maliyyə xərcləri və bank faizlərinin ödənilməsi bura daxil deyil. Maliyyə kreditinin ümumi məbləği 2,6 mlrd. dollar təşkil edir.
"BTC Co"nun səhmdarları aşağıdakılardır: BP (30,1 faiz); AzBTC (25 faiz); Chevron (8,90 faiz); Statoil (8,71 faiz); TRAO (6,53 faiz); Eni (5 faiz); Total (5 faiz); Itochu (3,40 faiz); Inpex (2,50 faiz); ConocoPhillips (2,50 faiz) və Amerada Hess (2,36 faiz).
