Azərbaycan, Bakı, 30 mart/ Trend , müxbir S.Babayeva/ 2008-ci ildə Avropada iri mobil rabitə operatorlarından biri və Azərbaycanda mol rabitə opertatoru Azercell Telecom-un təsisçilərindən olan TeliaSonera ölkədə yeni xidmətlərin tətbiqinə investisiya yatıracaq. Bu barədə şirkətin 2007-ci ilin yekunları üzrə hesabatında deyilir.
"Güclü artım böyük investisiya təlabatının olmasına dəlalət edir. Azərbaycan, Gürcüstan və Moldovada çox yaxşı coğrafi mobil əhatə şəbəkəsinə malik TeliaSonera əhatəni, xidmət keyfiyyətini artırmaq və yeni xidmətlər tətbiq etməyi planlaşdırır", - şirkət bildirir.
Şirkət yeni xidmətlər arasında Azərbaycanda, Qazaxıstanda və Moldovada 3G texnologiyasının tətbiqini qeyd edir. TeliaSonera-nın bu servisin reallaşdırılması üçün artıq Özbəkistan və Tacikistanda lisenziyası var.
Avrasiyada TeliaSonera-nən xalis satış həcmi 21,5 faiz artıb. Azərbaycan və Qazaxıstan xüsusi fəallıqla seçilib.
Şirkət Azərbaycan və Qazaxıstanda bazarda liderliyini saxlayıb və Özbəkistan, Tacikistan, Gürcüstan, Moldovada güclü mövqeyini qoruyub. TeliaSonera Qazaxıstan, Azərbaycan, Tacikistan, Moldova, Rusiya və Türkiyədə telekommunikasiya operatorlarına nəzərəçarpacaq investisiyalar yatırıb.
TeliaSonera fevralın 12-də Azərbaycanda Azercell Telecom-da 35,7 faiz dövlət payının özəlləşdirilməsinin başa çatması haqqında saziş imzalayıb. Hazırda digər yekun prosedurlar aparılır. Son nəticədə, Azertel-in mülkiyyəti 49, Fintur-un 51 faiz təşkil edir.
TeliaSonera 2002-ci ilin dekabrında İsveç və Finlandiyanın Telia və Sonera operatorlarının birləşməsi nəticəsində yaranıb. Şirkətin 690,000 -dən çox səhmdarı var. İri səhmdarlar İsveç (37,3%) və Finlandiya (13,7%) hökumətləridir. TeliaSonera və onun birgə müəssisələri birlikdə 18 ölkədə 100 mln. abunəçiyə xidmət göstərirlər. 2006-cı ildə şirkətn xalis mədaxili 91 mlrd. İsveç kronu, VKDAÖG (vergi, kredit dərəcələri və amartizasiyaların ödənilməsinədək gəlir) 32,266 mlrd. İsveç kronu, xalis gəliri 19,28 mlrd. İsveç kronu təşkil edib. Şirkət Fintur Holdings BV-nin vasitəsilə Azərbaycanın mobil operatoru Azercell Telecom-un səhmdarıdır. Belə ki, Fintur-un səhmlərinin 58,55 faizi TeliaSonera-ya məxsusdur.
Azercell Telecom 1996-cı il dekabrın 15-də fəaliyyətə başlayıb və hazırda 3 mln.-dan çox abunəçiyə xidmət göstərir. Bu günə Azərbaycanda GSM standartı üzrə ən iri operatordur.