Azərbaycan, Bakı, 24 sentyabr/ Trend , müxbir H.Vəliyev /
İqtisadi İnkişaf Nazirliyi elekton idarəetmə sisteminin yaradılması və tətbiqində texniki tapşırıqların hazırlanması üzrə tenderin yekunlarını elan edib. Bu barədə nazirliyin məlumatında deyilir.
Tenderin qalibi Megapolis DocNet sisteminin tətbiqi ilə məşğul olan "Ultra" şirkəti elan edilib.
Tenderdə Azərbaycan, Rusiya, Türkiyə və İsraildən olan 14 şirkət iştirak edib.
Hazırda "Ultra" şirkəti tərəfindən elektron idarəetmə sisteminin tətbiqi üzrə ilkin işlər aparılır.
İlkin mərhələdə "Ultra" şirkəti tərəfindən nazirlikdə "elektron sənəd dövriyyəsi", "kadrların idarə edilməsi" və "vətəndaşların müraciətlərinə baxılması" modullarının tətbiqi nəzərdə tutulur.
Sənədləşmə işində modulların tətbiqi sənədlərin hazırlanması və onların aidiyyatı üzrə çatdırılması zamanı vaxta qənaət etməyə və operativliyin təmin olunmasına geniş imkan yaradacaq, insan resurslarından daha az istifadə edilməsini və kağız sərfini aradan qaldıracaq.
"Vətəndaşların müraciətlərinə baxılması" modulu vətəndaşların suallarına operativ cavab verilməsini və bu proseslərin şəffaflığını təmin edəcək. "Kadrların idarə edilməsi" modulu isə kadrların professional bacarıqlarının artırılmasına səbəb olacaq.
İkinci mərhələdə isə yeni modulların əlavə edilməsi yolu ilə sistemin imkanları genişləndiriləcək. Elektron idarəetmə sisteminin nazirliyin strukturuna daxil olan və tabeliyindəki qurumlarda tətbiqi nəzərdə tutulur.
Məqalə müəllifi ilə əlaqə ünvanı: [email protected]
