Azərbaycan, Bakı, 02 noyabr / Trend , müxbir H.Vəliyev/
Azərbaycanda keçirilən Baku Tel-2009 Beynəlxalq sərgisi çərçivəsində Qara dəniz İqtisadi Əməkdaşlıq Təşkilatına (QİƏT) üzv ölkələrin rabitə nazirlərinin görüşünün yekunu olaraq, 2010-cu ilin mayına qədər QİƏT-in İKT qrupunun bəyannaməsi və iş planı qəbul ediləcək. Bu barədə Rabitə və İnformasiya Texnologiyaları Nazirliyinin məlumatında deyilir.
Nazirliyin məlumatına görə, QİƏT çərçivəsində telekommunikasiya və informasiya texnologiyaları sahəsində tərəflərin görüşü zamanı effektivliyin yüksəldilməsi və əməkdaşlığın genişləndirilməsinə dair məsələlər müzakirə olunub.
Azərbaycan may ayından oktyabr ayınadək QİƏT-ə rəhbərlik edib. Oktyabrın 22-də Bakıda xarici işlər nazirləri səviyyəsində keçirilən görüş çərçivəsində sədrlik səlahiyyəti Bolqarıstana verilmişdi.
Qara dəniz İqtisadi Əməkdaşlıq Təşkilatının yaranmasının əsasını təşkil edən Qara dəniz İqtisadi Əməkdaşlığı haqqında bəyannamə 1992-ci ildə İstanbulda regionun 11 ölkəsinin dövlət rəhbərinin iştirakı ilə imzalanıb. Hazırda QDİƏT-in 11 üzvü var: Azərbaycan, Albaniya, Ermənistan, Bolqarıstan, Yunanıstan, Gürcüstan, Moldova, Rusiya, Rumıniya,Türkiyə, Ukrayna və Serbiya.
Beynəlxalq təşkilat kimi QDİƏT-ə diqqət artır. Avstriya, Almaniya, Misir, İsrail, İtaliya, Polşa, Slovakiya, Fransa, Tunis, Belarus, Xorvatiya, ABŞ, Çexiya və Avropa Energetika Xartiyası Konfransının QDİƏT-ə nəzarət statusuna malik olması bu fikri təsdiqləyir.
Məqalə müəllifi ilə əlaqə ünvanı: [email protected]
