Azərbaycan, Bakı, 28 aprel /Trend, müxbir H.Vəliyev/
Ötən həftə rabitə və informasiya texnologiyaları naziri Əli Abbasov Fransanın Azərbaycandakı fövqəladə və səlahiyyətli səfiri Qabriel Kellerlə görüşüb. Bu barədə nazirliyin məlumatında deyilir.
Görüşdə son illər Azərbaycanın bütün sahələrdə dinamik inkişaf edərək, regionda lider dövlətə çevrildiyini və iqtisadi qüdrətinin artdığını diqqətə çatdıran nazir, bütün sahələrdə olduğu kimi, rabitə və informasiya texnologiyaları sektorunda da yüksək nəticələr əldə olunduğunu vurğulayıb.
İKT sektorunda yeni inkişaf perspektivlərinin nəzərdən keçirildiyini bildirən Əli Abbasov, daha yüksək nailiyyətlər üçün əməkdaşlıq əlaqələrinin genişləndirilməsinin vacibliyini qeyd edib.
Fransanın Azərbaycanda kosmik sənayenin yaradılması və telekommunikasiya peyklərinin orbitə çıxarılması ilə maraqlandığını qeyd edən nazir, uğurlu dövlət siyasətinin nəticəsi kimi respublikada bu sahədə həyata keçirilən işlər barədə ətraflı məlumat verib.
Eyni zamanda, Əli Abbasov ölkədə diplomatik fəaliyyəti dövründə səfir Q.Kellerin ikitərəfli əlaqələrin daha da möhkəmlənməsinə böyük töhfələr verdiyini qeyd edərək, qarşılıqlı əməkdaşlığın perspektiv nəticələr verəcəyinə əminliyini vurğulayıb.
Səfir isə öz növbəsində ölkələr arasında ikitərəfli münasibətlərin uğurla inkişaf etdiyini bildirərək, bundan sonra münasibətlərin daha da genişlənməsi üçün səylərini əsirgəməyəcəyini qeyd edib. O, Azərbaycanla Fransanın bir çox sahələrdə uğurla əməkdaşlıq üçün böyük potensiala malik olduğunu vurğulayıb.
Eyni zamanda, Q.Keller Azərbaycanın informasiya kommunikasiya texnologiyaları sektoru üzrə olduqca qətiyyətli siyasət yürütdüyünü qeyd edərək, gələcək tərəfdaşlığın müsbət nəticələr verəcəyi qənaətində olduğunu bildirib. Onun sözlərinə görə, Fransa tərəfi xüsusilə, kosmik sənaye və telekommunikasiya peyklərinin orbitə göndərilməsi istiqamətində əməkdaşlığa böyük önəm verir.
"Arian" daşıyıcı-raketin istehsalını, istismarını və marketinq işlərini həyata keçirən və indiyədək 277 peykin orbitə çıxarılmasını təmin etmiş Fransaya məxsus "Arianespace" şirkəti barədə danışan səfir Azərbaycanın bu şirkətlə əməkdaşlığının qarşılıqlı uğur gətirəcəyini bildirib.
