Azərbaycan, Bakı, 19 iyul /Trend, müxbir H.Vəliyev/
Rusiyanın "TransTeleKom" şirkətinin (ticarət markası TTK) "EurasiaHighway" Avrasiya informasiya magistralı Azərbaycanın təşəbbüskarı olduğu "Şərq-Qərb" informasiya supermagistralı layihəsinin tikintisi zamanı əsas təməl kimi xidmət edə bilər.
Bu fikir Düşənbədə keçirilən Regional Rabitə Birliyinin (RBB) elektrik rabitəsi operatorları Şurasının və RRB-nin elektrik rabitəsi üzrə komissiyasının birgə iclasında səsləndirlib.
Azərbaycanı iclasın işində Rabitə və İnformasiya Texnologiyaları Nazirliyi təmsil edib və iclasın gündəliyinə "Şərq-Qərb" transmilli informasiya supermagistralının həyata keçirilməsi məsələsini daxil edib.
TTK-nın vitse-prezidenti və beynəlxalq satış departamentinin rəhbəri Aleksandr Stolyarovun sözlərinə görə, yaxın beş il ərzində MDB ölkələrinin beynəlxalq telekommunikasiya həcmlərində payı 4 dəfə artacaq. Bununla yanaşı, Rusiya bu regiondan əsas konsentrator olaraq qalacaq (bu gün o, MDB ölkələrinə internet-trafik tranzitinin 60 faizə qədərini toplayır).
"Biz MDB çərçivəsində biznesin inkişafı üçün çox yaxşı perspektivlər görürük. Bizim vəzifəmiz trafik tranzitinin optimal yollarını təklif etmək və RRB operatorları üçün əsas magisrtal internet provayderi olmaqdır", - Stolyarov bildirib.
TTK şirkətinin xarici operatorların trafikinin buraxılması üçün nəzərdə tutulan "EurasiaHighway" Avrasiya informasiya magistralı altı il əvvəl tikilib və bu gün 110 Gbit/s buraxılış qabiliyyətinə malikdir.
"EurasiaHighway" demək olar Rusiya ilə həmsərhəd olan bütün ölkələrə, o cümlədən Belarus, Ukrayna, Cənubi Qafqaz ölkələri (Azərbaycandan keçməklə) və Mərkəzi Asiyaya (Qazaxıstandan keçməklə) güclü çıxışlara ( 10 Qbit/s-dan az olmamaqla) malikdir və "Şərq-Qərb" magistralının tikintisində istifadə oluna bilər.
"Şərq-Qərb" informasiya supermagistralının yaradılması üzrə Azərbaycanın irəli sürdüyü təşəbbüs BMT Baş Assambleyasının 64-cü sessiyasının 66-cı iclasında qəbul edilib.
Layihə ümumilikdə 20 ölkəni birləşdirəcək və regionun inkişafında mühüm rol oynayacaq. Layihənin həyata keçirilməsi Qərbi Avropa və Sakit okean hövzəsinə daxil olan ölkələr arasındakı "uçurum"u aradan qaldırmağa imkan verəcək.
