...

2020-ci ilə Azərbaycanda İKT sektorunun gəlirləri neft-qaz sənayesinin gəlirlərini ötə bilər - nazir

Telekommunikasiya Materials 6 Sentyabr 2010 16:50 (UTC +04:00)

Azərbaycan, Bakı, 6 sentyabr /Trend, müxbir H.Vəliyev/

Azərbaycanda dövlət büdcəsinin fundamental innovasiya tədqiqatlarının maliyyələşdirilmə həcmi 0,3 - 0,5 faiz təşkil edir. Bu barədə Azərbaycanın rabitə və informasiya texnologiyaları naziri Əli Abbasov bildirib.

Nazirin sözlərinə görə, bu göstərici inkişaf etmiş ölkələrin göstəriciləri ilə müqayisədə o qədər də böyük deyil, lakin hökumət daima bu istiqamətdə iş aparır.

"İndi qloballaşan dünyada informasiya və kibernetika sahəsinə münasibət müxtəlif cür ifadə edilir. ABŞ-da tədqiqatların 80 faizi özəl sektor tərəfindən maliyyələşir. Əgər biz bu istiqamətin prioritetliyindən danışırıqsa, innovasiya inkişafında başlıca məsələ özəl sektorun bilavasitə iştirakından ibarətdir. Hökumətin bu istiqamətdə həyata keçirdiyi əhəmiyyətli addımlardan biri, yaxın vaxtlarda tətbiq ediləcək regional innovasiya zonasının (RİZ) yaradılması layihəsidir ki, bu da onun iştirakçıları üçün xeyli güzəştlərin tətbiqini nəzərdə tutur", - Abbasov qeyd edib.

Nazirin sözlərinə görə, RİZ-in yaradılması üzrə işlər planlaşdırılan qrafik üzrə gedərsə, artıq 2020-ci ilə Azərbaycanda İKT sektorunun gəlirləri neft-qaz sənayesinin gəlirlərini ötə bilər və bununla da Azərbaycan iqtisadiyyatının inkişaf lokomotivi ola bilər.

Nazirliyin proqnozlarına görə, layihənin uğurla həyata keçiriləcəyi təqdirdə, RİZ layihələrindən gələcək gəlirlər 2020-ci illə 12 milyard dollara çatacaq.

İndiyədək Azərbaycanda RİZ-in yaradılması üzrə təkliflər artıq hökumət tərəfindən göndərilib və müvafiq strukturlarla razılaşdırılıb.

Hazırda nəzərdən keçirilən mühüm məsələlərdən biri vergi, sosial və gömrük rüsumlarının azaldılması, bəzi hallarda sıfıra endirilməsidir. Bu məsələlərin müsbət həlli Azərbaycanda məhsul idxalı üçün münbit şərait, həmçinin, gələcəkdə regional bazarlara ixrac edilməklə ölkə ərazisində xarici investorların istehsalat xəttinin təşkili üçün əlverişli mühit yaradacaq.

Azərbaycanda regional innovasiya zonası layihəsi orta və kiçik innnovasiya sahibkarlığının inkişafı üçün texnoparkların, elektron avadanlığın və proqram təminatının istehsalı və ixracı üzrə regional bazanın yaradılmasını, ölkənin effektiv tranzit məlumat mərkəzinə çevrilməsini, formalaşan informasiya cəmiyyəti üçün insan resurslarının hazırlanması və inkişafını, müxtəlif sahələrdə informasiya texnologiyalarının tətbiqini nəzərdə tutur.

Xəbər lenti

Xəbər lenti