Azərbaycan, Bakı, 1 dekabr /Trend, müxbir H.Vəliyev/
Yaxın iki gün ərzində Rabitə və İnformasiya Texnologiyaları Nazirliyi nömrələrin daşınması (Mobile Number Portability - MNP) xidmətlərinin tətbiqi üzrə proqramın ilkin variantını hazırlamağı və müzakirə etməyi planlaşdırır. Bu barədə çərşənbə günü rabitə və informasiya texnologiyaları nazirinin müavini İltimas Məmmədov bildirib.
"Bununla əlaqədar hazırda hüquqi bazanın yaradılması üzrə işlər görülür. Bu layihənin həyata keçirilməsi ilə bağlı hansısa konkret addımlar barədə danışmaq hələ tezdir", - Məmmədov deyib.
Hazırda nazirlik tərəfindən MNP xidmətlərinin tətbiqi üçün qaydalar hazırlanıb, hüquqi bazanın formalaşması üçün isə müvafiq qaydalar işlənir ki, orada da bu xidmətin tətbiq olunduğu ölkənin təcrübəsi öz əksini tapıb.
Bir müddət əvvəl Məmmədovun dediyi kimi, xidmətin tətbiq olunması üçün bir sıra texniki və normativ-hüquqi məsələlərin həlli vacibdir. İlkin mərhələ üzrə normativ bazanın yaranmasından sonra xidmət mobil rabitə operatorlarının şəbəkələrinə, gələcəkdə isə zərurət yaranacağı halda, stasionar rabitə operatorlarının şəbəkələrinə tətbiq olunacaq.
Azərbaycanda MNP xidmətinin tətbiqi abonentlərə operatoru dəyişəcəkləri halda öz nömrələrini saxlamağa imkan verəcək ki, bu da onları nömrələrini dəyişdikləri barədə yaxın adamlarını və iş tərəfdaşlarını xəbərdar etmək zərurətindən azad edir.
Azərbaycanda xidmətin tətbiqi üçün işçi qrupu yaradılıb ki, bura Azərbaycanın telekommunikasiya xidmətləri bazarında fəaliyyət göstərən mobil rabitə operatorları da daxildir.
Bu gün MNP xidməti Avropanın bir çox ölkələrində tətbiq edilir və onların təcrübəsi göstərir ki, bu xidmət tələbdən asılı olaraq tədricən tətbiq edilir və bu proses iki-üç il ərzində uzana bilər.
Nömrələrin daşınması xidmətinin tətbiqi rəqabətin inkişafını stimullaşdırır, çünki operatorlar öz əvvəlki abonentlərini saxlamaq üçün əlavə səylər və yenilərinin cəlb olunması üçün daha cəlbedici xidmətlər göstərməli olacaqlar.
