Azərbaycan, Bakı, 20 aprel /Trend, müxbir H.Vəliyev/
Azərbaycanın İT şirkəti SİNAM Qırğızıstan Dövlət Vergilər Xidmətinin avtomatlaşdırılmasını bu ilin birinci yarısında başa çatdıracaq. Bu barədə Trend-ə çərşənbə günü şirkətin prezidenti Elçin Əliyev deyib.
SİNAM şirkəti bu ölkənin Vergilər Xidmətinin elan etdiyi beynəlxalq tenderin qalibidir. Proqram təminatının həyata keçirilməsi Asiya İnkişaf Bankının elan etdiyi "Vergi inzibatçılığında islahat və modernləşdirmə" layihəsi çərçivəsində həyata keçiriləcək.
Əliyevin sözlərinə görə, bu günlərdə şirkət Qırğızıstanın Vergi Müfəttişliyinində modulun "alma" funksiyasını nümayiş etdirib.
Məlumata əsasən, "birləşdirmə" modul üzrə də işlər başa çatıb, gələn həftə isə "apelyasiya" modulu təhvil veriləcək.
Sistemin Web-saytı artıq hazırdır və mayın sonuna kmi bütün modullar üzərində iş başa çatmalıdır.
İşlərin başa çatdırılması ilin sonuna planlaşdırılmışdı. Əliyevin sözlərinə görə, lakin templər nəzərə alınaraq, iş iyunun ortalarında tam başa çatdırılacaq.
"Sistemin işə başlamasının yubanması yalnız avadanlıq vaxtında tədarük edilməsə ola bilər. Qırığızıstan Vergilər Xidməti avadanlığın alınması üzrə tender keçirməlidir. İlkin olaraq avadanlığın tədarükünə sentyabrda başlana bilər", - Əliyev qeyd edib.
"Bu gün sifarişçi iki variantı, yəni sistemin mərkəzləşdirilmiş fəaliyyət göstərib-göstərməyəcəyini nəzərdən keçirir. Biz mərkəzləşdirilmiş sistem təklif edirik, belə ki, bu halda ölkənin regionları üzrə bölüşdürülən ayrıca məlumatlar bazasına xidmətlərin göstərilməsinə ehtiyac olmur. Mərkəzləşdirilmiş sistem Web-interfeys vasitəsilə fəaliyyət göstərə bilər. Sifarişçinin əsas narahatlığı telekommunikasiya infrastrukturundan istifadə etməklə bütün ölkə regionlarında sistemin lazımi fəallığını təmin edib-etməyəcəyi ilə bağlıdır. Biz "Qırqız telekom"un və mobil operator "Bilayn"nın telekommunikasiya infrastrukturundan istifadəni təklif etmişik. Artıq "Qırqız telekom" ilə müəyyən razılıq əldə olunub. O, 256 Кbit/s kanalını, "Bilayn" isə GPRS Backup xəttini verməyə hazırdır", - Əliyev əlavə edib.
Proqram təminatı Qırğızıstan Dövlət Vergilər Xidmətinin mərkəzi aparatında və ölkənin bütün rayon vergi müfəttişliklərində quraşdırılacaq. Tətbiq edilən informasiya sistemi 11 komponentdən ibarət olacaq ki, onların da hər biri bir istiqamət üzrə yüksək funksionallığı təmin edəcək.
Vergi inzibatçılığı üçün işlənib hazırlanmaqda olan proqram təminatının tərkibinə vergiödəyicilərin qeydiyyatı, gəlirlərin uçotu, bəyannamələrin işlənməsi, audit, borcların məcburi tutulması, apelyasiya, üçüncü tərəfin məlumatları və güclü korporativ sayt daxil olacaq. Proqram təminatı Dövlət Vergilər Xidmətinin mərkəzi aparatını, iri vergiödəyicilərlə iş üzrə idarəni və 55 rayon müfəttişliyini vahid informasiya sistemi çərçivəsində birləşdirməyə imkan verəcək və avtomatlaşdırılmış hesabatların hazırlanması üçün imkan yaradacaq. Bundan əlavə, hökumətin digər maliyyə qurumları ilə məlumat mübadiləsi və verilənlər bazasının sinxronlaşdırılması da təmin olunacaq. Vergiödəyicilərlə işi daha da yaxşılaşdırmaq məqsədilə "Call-mərkəz" sistemi tətbiq olunacaq.
Proqram həllərinin tətbiqi Qırğızıstanın vergi orqanlarına vergi yığımı prosesini daha səmərəli şəkildə idarə etməyə imkan verəcək və dövlət büdcəsinə vergi yığımının səviyyəsini artıracaq.
Layihə üzrə işlərin iki il ərzində başa çatdırılması planlaşdırılır. Layihənin dəyəri üç milyon dollardan çox qiymətləndirilir.