Azərbaycan, Bakı, 20 aprel /Trend, müxbir H.Vəliyev/
Rusiyanın informasiya təhlükəsizliyi sistemləri istehsalçısı "Kasperski laboratoriyası" Azərbaycanın təhsil sektoru üçün öz həllərinə əhəmiyyətli endirimlər təklif edə bilər. Bu barədə çərşənbə günü Trend-ə "Kasperski laboratoriyası"nın EEMEA regionu üzrə akkaunt-meneceri Konstantin Matyuxin bildirib.
Onun sözlərinə görə, güzəştlər 20 faizədək və standart qiymət vərəqəsindən yüksək təqdim edilə bilər. Bir qayda olaraq, bu cür layihələr şirkətin tərəfdaş şəbəkəsi vasitəsilə reallaşdırılır və sifarişçilər çox tez-tez şirkətin imzaladığı məhsulun funksionalı üzrə öz tələblərini irəli sürürlər.
"Güzəştli şərtlərlə həllərin verilməsi layihənin böyüklüyündən asılıdır. Başqa sxemlər də yolveriləndir. Ümumilikdə isə bizdə təhsil və dövlət müəssisələri üçün endirimlər var, onlar hətta bəzən çox əhəmiyyətli olurlar. Bilavasitə təhsil sektoruna gəldikdə isə, biz ona bir çox ölkələrdə, o cümlədən Azərbaycanda kifayət qədər ciddi diqqət yetiririk", - Matyuxin deyib.
Bir az əvvəl Təhsil Nazirliyinin Təhsil Sistemlərinin İnformasiyalaşdırılması İdarəsinin rəisi Samir Məmmədov Trend-ə bildirmişdi ki, "Kasperski laboratoriyası" Azərbaycanda təhsil müəssisələrinin kompüterləşdirilməsində maraqlıdır və bu gün şirkət Azərbaycan tərəfinə öz məhsullarının xüsusi güzəştli tarifləri üzrə variantları nəzərdən keçirir. "Kasperski laboratoriyası"nın həlləri Azərbaycanın təhsil sistemində çoxdan tətbiq olunur və Məmmədovun dediyi kimi, bu gün məsələ əməkdaşlığın genişləndirilməsindən ibarətdir. Şirkətin konkret təkliflərlə çıxış etməsindən sonra müvafiq olaraq Azərbaycan tərəfi onlara baxmağa hazır olacaq.
