Azərbaycan, Bakı, 4 aprel /Trend, müxbir H.Vəliyev/
Birinci rübün yekunları üzrə "Xalq kompüteri" layihəsi çərçivəsində 1733 fərdi kompüter satılıb. Bu barədə çərşənbə günü Trend-ə "Best Comp Group" şirkətindən məlumat veriblər.
Layihə çərçivəsində satılan fərdi kompüterlərin sayı 17 707 ədədə çatıb. Yanvar-mart aylarının nəticələri üzrə kompüterlərin satış artımı 9,7 faiz təşkil edib.
Birinci rübün yekunları üzrə dəyəri 1,12 milyon manatdan çox olan kompüter texnikası əldə edilib. Bu zaman kompüterin orta hesabla qiyməti 650 manat təşkil edib.
Layihənin buraxılmasından etibarən (2009-cu ilin aprel ayı) ümumilikdə ona 11 milyon manatdan çox investisiya qoyulub.
Reallaşdırılan kompüterlərin ümumi sayından 2822 ədədi Bakıda, qalanı isə regionlarda satılıb.
Ümumilikdə, layihə çərçivəsində 17 018 ədəd kompüter müəllimlər, 189 ədəd şagirdlər, 493 ədəd tələbələr, 7 ədəd isə səhiyyə işçiləri tərəfindən əldə edilib.
Layihə çəçivəsində satılan kompüterlərin 90 faizdən çoxu portativ texnikanın payına düşür.
